• Спорт
• 13 Мамыр, 2021

Яш спортчиниң новәттики утуғи

Спорт билән шуғуллиниватқан қизилғәйрәтлик өсмүрләр арисида йезимизниңла әмәс, бәлки елимизниң шәнини қоғдаватқанларму бар. Шуларниң бири – Амир Маликов, 8-синип оқуғучиси. Кичигидин спортқа иштияқ бағлиған Амир бүгүнгә қәдәр бирмунчә утуқларға йетип, жутдашлириниң бешини көккә йәткүзүватиду.
Йеқинда “Новәттики турнирда йәнә ғалип атилипту”, дегән хуш хәвәрни аңлап, уни тәбрикләп бардуқ. Һәқиқәтәнму, Амир Маликов Алмута шәһиридә өсмүрләр арисида киокушин-будокай каратэдин өткән чемпионатта 40 килограммлиқ салмақ дәриҗиси бойичә чемпион атилипту. Амир вә униң ата-анисини сәмимий тәбриклигәч, яш спортчиниң «паалийити» билән тонуштуқ.
Амирниң бөлмисидә тамға илинған медаль вә пәхрий ярлиқлар һәрхил спорт түрлири бойичә берилгән еди. Бизниң һәйран қеливатқинимизни сәзгән у: «Һәҗәпләнмәң ака, мән пәқәт каратэ биләнла шуғулланмаймән. Шәриқниң йәкму-йәк күрәшлириниң һәммиси мени қизиқтуриду. Имканийитимниң яр беришичә, мәшиқлиниш давамида уларни қатар елип беришқа тиришимән. Һәтта, қазақчә жекпе-жектин Қордай шәһиридә өткән хәлиқара турнирда биринчи орунни йеңивалғиним бар» деди. Һәқиқәтәнму биз көргән мукапатлар Амирниң каратэдин Қазақстанниң икки дүркүн чемпиони вә җумһурийәт талланма командисиниң әзаси екәнлигини испатлап туратти. 
Амир Маликов спортта мошундақ утуқ-муваппәқийәтләр қазинип, биринчи новәттә, ата-анисиниң, андин спортниң қир-сирлирини еринмәй үгитиватқан устазлириниң еқидисини ақлаватиду. Әлвәттә, биз, қизилғәйрәтликләр, жутдаш инимизниң келәчәктә бүйүк чоққилардин көрүнүшигә тиләкдашлиқ билдүримиз. 

Қасимҗан ЧОРУҚОВ.
Талғир наһийәси.