Әхбаратлар еқими
10 Маусым, 2021

Уруқ-туққанлар даириси чәклиниду

Қазақстанда бирпүтүн пенсия төләмлирини алғандин кейин турушлуқ өй сетивелиш-сетиш келишимлирини орунлалайдиған уруқ-туққанлар даириси чәклиниду.
Индустрия вә инфрақурулумлуқ тәрәққият министрлигидә шуниңға мунасивәтлик йеңи қаидиләр тәйярланди. Җүмлидин йолдишиниң яки аялиниң йеқин уруқ-туққанлири билән келишим түзүшниң мәнъий қилинидиғанлиғи көздә тутулуватиду.
– Бир вақитлиқ пенсия төләмлирини йолдишидин яки аялидин, төләм алғучи вә буйрутма бәргүчиниң йеқин туққанлиридин, шундақла йолдишиниң йеқин туққанлиридин өй сетивелишқа пайдилинишқа йол қоюлмайду. Мошу пунктниң орунлинишини назарәт қилиш мәхситидә төләм алғучи бир вақитлиқ пенсия төлимигә электронлуқ буйрутма бәргәндә шәхсий кабинетта жуқурида атап көрситилгән шәхсләрдин өй сетип алмайдиғанлиғи тоғрилиқ мәҗбурийәтни имзалайду, – дейилиду һөҗҗәттә.
Һөҗҗәттә тәкитлинишичә, ата-анилар, балилар, бала беқивалғучилар, беқинивелинған балилар, уттур вә уттур әмәс ака-ука вә һәдә-сиңиллар, бовилар, момилар, нәвриләр йеқин уруқ-туққан болуп һесаплиниду.
Министрликтә түзитишләр қейинатисини, қейинанисини вә әр-аялларниң жуқурида аталған уруқ-туққанлирини пенсия төләмлирини пайдилинип, өй сетивелиш-сетиш бойичә сахта операцияләргә җәлип қилишни истисна қилиду, дәп һесаплайду.
Биринчи новәттә, мәзкүр норма күчкә егә қанунниң нормативлиқ һөҗҗәтлири оттурисидики қариму-қаршилиқни истисна қилиду. Дөләт рәһбири пенсия үчүн топланған ахчиниң қериғанда яшаш дәриҗисини тәминләш керәк екәнлигини бәлгүлиди. Шундақла йеңи тәшәббус билән уларни пәқәт давалиниш яки турушлуқ өй шараитини яхшилаш үчүн пайдилинишқа рухсәт қилинди.
Министрлик шундақла Президентниң Пәрманида пенсия төләмлири һесавиға йеқин уруқ-туққанлар, әр-аяллардин турушлуқ өй сетивелиш имканийитиниң истисна қилинидиғанлиғини атап көрсәтти.
Шуниң билән бир вақитта Гражданлиқ қанун вә “Нека (әр-аяллиқ) вә аилә тоғрилиқ” Кодексқа мувапиқ, нека вақтида сетивелинидиған мүлүк әр-аялниң бирләшкән мүлки болуп һесаплиниду.
Отбасы банкниң 2021-жил 26-майдики мәлуматлири бойичә 159 620 ошуқ қазақстанлиқ пенсия пулиниң бир қисмини қәрәлидин илгири сетивелиш имканийитидин пайдиланди. Улар алған умумий ахча бир триллион тәңгини тәшкил қилди. Бу ахчиниң 51 пайизи өй сетивелишқа ишлитилди.