• Әхбаратлар еқими
  • 10 Маусым, 2021

Экология проблемилириға беғишланди

Йеқинда Хәлиқара йешил технологияләр вә инвестициялик лайиһиләр мәркизидә болуп өткән «дүгләк үстәл» мәҗлисидә экологиялик билим, яшларда йеңи экологиялик тәпәккүрни шәкилләндүрүш вә тәбиәтни қоғдаш паалийитигә җәлип қилиш мәсилилири муһакимә қилинди.
 Бу йәрдә Қазақстан Җумһурийитиниң экология, геология вә тәбиәт ресурслири министри Мағзум Мырзағалиев яш эксперт-экологлар вә студентлар билән учрашти. 
Министр Қазақстанда экология мавзусиниң техиму актуаллиққа егә болуп, дөләт тәрипидин түрлүк дәриҗиләрдә көтириливатқанлиғини тәкитлиди. Шуниң билән биллә, униң сөзичә, өткән жили башланған пандемия инсанийәткә тәбиәтниң ролини вә инсан балисиниң униңдики орнини қайта чүшиниш имканийитини яратти. Мағзум Мырзағалиев һаваниң паскинилишишини, чиқиндиларниң мувапиқ һалда қайта ишләнмәйватқанлиғини вә климатниң өзгиришини асасий проблемилар сүпитидә атап көрсәтти.
 – Мәркизий Азия региони климатлиқ өзгиришләргә сәзгүр регионларниң бири болуп һесаплиниду. Кейинки 100 жилда Қазақстанда һарарәт 1,37 градус көтирилди. Әпсуски, һарарәтниң көтирилиш тенденцияси чапсанлимақта. Шуңлашқа бу һәммимиз үчүн җиддий ховуп-синақ болуп һесаплиниду, – деди министр. 
 Шуниң билән биллә у климатниң өзгириш проблемисини биртәрәп қилишниң углеродни көп ишләтмәсликтин ибарәт екәнлигини атап көрсәтти. Җүмлидин өткән жилдин етиварән идарә углерод аз ишлитилидиған ихтисатқа көчүш концепциясини ишләп чиқишни қолға алди, уни 2050-жилда әмәлгә ашуруш планлиниватиду.
 «Дүгләк үстәл» мәҗлисидә елимиз алий оқуш орунлириниң студентлири, магистрантлири өз лайиһилири вә тәтқиқатлирини тәвсийә қилип, экологиялик проблемиларни һәл қилиш бойичә пикир-тәклиплирини оттуриға қойди. Мәсилән, улар Қазақстанда углеродни ишлитишни төвәнлитиш, ичидиған суниң сүпити, мәмликәттә орманлиқларни көпәйтиш, балилар бағчилири билән мәктәпләрдә экологиялик билимни уюштуруш охшаш мәсилилирини көтәрди.
 Қазақстан Җумһурийитиниң Президенти йенидики Аяллар ишлири вә аилә-демографиялик сәясәт бойичә миллий комиссия рәисиниң орунбасари, «Біздің Жайық» «Экологиялик-туристик һәрикити» җәмийәтлик бирләшмисиниң рәиси Елена Тарасенкониң сөзичә, экология, геология вә тәбиәт ресурслири министри билән учришиш наһайити қизиқарлиқ вә мәзмунлуқ болди.
 – Һазир Экология, геология вә тәбиәт ресурслири министрлигиниң паалийити очуқлуғи билән пәриқлиниду. Яшлар, җамаәтчилик билән өткүзүлидиған бу хилдики учришишлар наһайит әһмийәтликтур. Биринчидин, саһаға мунасивәтлик беваситә идариниң әхбарат мәнбәсигә егә болимиз. Иккинчидин, бу яшларниң тәшәббусиға қулақ селиш имканийити, шундақла, әтималим, яшлар үчүнму уларни тиңшаватқанлиғи, қоллап-қувәтләватқанлиғи муһим болса керәк. Бүгүн тәвсийә қилинған әмгәкләрдин елимиз алий оқуш орунлири түрлүк йөнилиштики экологизациягә мәнпийәтдар, дәп хуласә чиқиришқа болиду вә шу нәрсә қизиқарликки, варислиқ һәм мурабилик моҗут болуватиду, – дәп тәкитләйду Елена Тарасенко.
 У шундақла җумһурийәттә яш әвлат арисида экологиялик мәдәнийәтни шәкилләндүрүш мәсилисиниң пишип йетилгәнлигини тәкитлиди.
 Шуни әслитип өтүмизки, үстимиздики жилниң бешида Дөләт рәһбири Экологиялик кодексни имзалиди, у «паскинилаштурғучи һәқ төләйду вә әһвални түзитиду», дегән принципқа асаслиниду. Экологиялик әһвални яхшилаш вә карханиларниң әтрап муһит алдидики җавапкәрлигини ашуруш мәхситидә әң яхши технологияләрни җарий қилиш йеңи Экологиялик кодексниң асасий маддиси болуп һесаплиниду. 

407 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы