• Әхбаратлар еқими
• 10 Маусым, 2021

Һәмкарлиқ техиму күчийиду

Дөләт рәһбири Қасым-Жомарт Тоқаев Қазақстанға иш бабидики сәпәр билән кәлгән Әрмәнстан Президенти Армен Саркисян билән учрашти.
Музакириләр давамида Қасым-Жомарт Тоқаев билән Армен Саркисян Қазақстан-Әрмәнстан оттурисидики һәмкарлиқни тәрәққий әткүзүш, җүмлидин сәясий диалогни, сода-ихтисадий вә мәдәний-гуманитарлиқ алақиларни күчәйтиш мәсилилирини муһакимә қилди. Президентлар шундақла Евразия ихтисадий иттипақи, КБШТ вә башқиму көптәрәплимилик қурулумлар даирисидики өзара һәрикәт истиқбалини қарап чиқти һәм хәлиқара вә регион күн тәртивидики мәсилиләр бойичә пикирләшти.
Қазақстан Президенти Армен Саркисян сәпириниң иккитәрәплимә һәмкарлиқни техиму күчәйтиш нуқтәий нәзәридин муһим әһмийәткә егә екәнлигини тәкитлиди.
– Әрмәнстан бизгә йеқин дөләт. Мәмликәтлиримиз оттурисидики өзара мунасивәтләр әсирләр мабайнида шәкилләнгән әнъәниләргә асаслиниду. Тәбиийки, биз һәмкарлиқниң бир йәрдә тохтап қалмай, бәлки йеңи мәзмун билән бейитилишиниң тәрәпдари. Шуңлашқа мәмликәтлиримиз һөкүмәтлири вә ениқ саһалиқ идариләр мошу мәхсәтни қолға кәлтүрүш үстидә ишләватиду, – деди Дөләт рәһбири.
Қасым-Жомарт Тоқаев Әрмәнстан һөкүмәт делегациясиниң йеқинда Қазақстанға қилған сәпириниң йәкүнини иҗабий баһалап, түрлүк саһалардики һәмкарлиқни күчәйтиш үчүн яхши имканийәтләрниң моҗут екәнлигини тәкитлиди.
Дөләт рәһбири шуниң билән бирқатарда Қазақстан-Әрмәнстан оттурисидики өзара һәрикәтниң ЕАИИ, КБШТ, МДҺ, БМТ вә ЕБҺТ даирисидиму давамини тапидиғанлиғиға ишәнчә һасил қилди.
Өз новитидә Армен Саркисян Қасым-Жомарт Тоқаевқа Қаазақстанни зиярәт қилиш имканийитини яратқанлиғи үчүн миннәтдарлиқ билдүрди.
– Қазақстанни зиярәт қилиш мениң үчүн, һәрқачанқидәк, мундақ ейтқанда, өз өйүмгә, өз достлиримға кәлгәндәк. Сиз ейтип өткәндәк, бизниң хәлиқлиримиз наһайити яхши, узақ, чоңқур вә қедимий өзара мунасивәтләргә егә, – дәп тәкитлиди у.
Әрмәнстан Президенти Дөләт рәһбириниң Нур-Султан вә Ереван оттурисидики мунасивәтләрниң техиму кәңийиш үчүн чоң иқтидарға егә екәнлиги тоғрилиқ пикрини қоллап-қувәтлиди. Бу йосунда у сода, билим, йеңи технологияләр, озуқ-түлүк мәһсулатлирини қайта ишләш саһалирида ечиливатқан яхши шараитқа диққәт ағдурди вә бу һәмкарлиқниң техиму мәзмунлуқ һәм кәң болушини халайдиғанлиғини билдүрди.
Әрмәнстан Президенти шундақла Қаазақстанниң Тунҗа Президенти –Елбасы Нурсултан Назарбаев биләнму учрашти.
Тәрәпләр икки мәмликәт оттурисида мустәқиллик жиллирида қолға кәлтүрүлгән һәмкарлиқниң жуқури дәриҗигә егә екәнлигини тәкитләп, регион күн тәртивиниң муһим мәсилилири бойичә пикирләшти.
Әрмәнстан Җумһурийитиниң Президенти Армен Саркисян шундақла Мәҗлис рәиси Нурлан Нигматулин билән учрашти. 
Мәҗлис рәиси бийилқи жилниң Қазақстан вә Әрмәнстан Мустәқиллигиниң 30 жиллиғи бәлгүси астида өтүватқанлиғини қәйт қилип, икки мәмликәт хәлиқлириниң мәнпийәтлиридә үнүмлүк һәмкарлиқни техиму күчәйтишниң муһим екәнлигини тәкитлиди.
Өз новитидә Әрмәнстан Президенти мәмликитимизниң аләмшумул җәриянларда муһим роль ойнаватқанлиғини тәкитләп, милләтләрара вә конфессияләрара разимәнликни Қазақстанниң әң чоң утуқлириниң бири дәп атиди.