- Инкас
- 02 Қараша, 2012
Бу келәчәк әвлатқа керәк
«Тарих савақлири яки Өтмүшсиз келәчәк йоқ» намлиқ китапни оқуп, һаяжанлиниш вә қанаәтлиниш тәсиратлири илкидә қалдим. Мәзкүр китапниң чиққиниға хелә вақит болған болсиму, қолумға әнди тәгди. Һәқиқәтәнму, оқурмән қәлбиниң тәшналиғини қандурған мәзкүр топламда һаяттин бевақит өткән жутдишимиз, көрнәклик уйғуршунас алим, философия пәнлириниң намзити Коммунар Талиповниң бизгә мәлум болмиған әмгәклири йоруқ көрүпту. Көп издинип, көләмлик тарихий һөҗҗәтләргә һәм өтмүштики қанлиқ вақиәләр шаһитлири билән болған сөһбәтләргә асаслинип йезилған мақалиларда җапакәш хәлқимизниң тәғдири әйнән тәсвирләнгән.
Топламни нәширгә тәйярлиған Қазақстан Жумһурийитигә хизмәт көрсәткән әрбап, «Уйғур авази» гезитиниң сабиқ баш муһәррири Йолдаш Азаматовқа оқурмән сүпитидә миннәтдарлиғимни билдүргүм келиду. Униңға узақ өмүр, мустәһкәм саламәтлик вә аиләвий хатирҗәмлик тиләймән. Кәлгүсидә мошундақ чоңқур мәзмунлуқ китапларниң көпирәк нәшир қилинишини халиған болар едуқ. Чүнки бу бизниң келәчәк әвлатлиримиз үчүн керәк.
Тохтахун МАХМУТОВ.
Уйғур наһийәси.
418 рет
көрсетілді0
пікір
