- Замандаш
- 02 Қараша, 2012
Дост қәдри
Дана әҗдатлиримиз «Миң сәр пулуң болғичә, миң достуң болсун» дәп бекар ейтмиған. Һә, достниң һаятимизда тутидиған орни алаһидә. Һәқиқий дост хошаллиғиңда, бешиңға күн чүшкәндә, сәпәрдә биллә болғанда синилидекән. Әйнә шундақ талай синақлардин сүрүнмәй өтүп келиватқан қәдинас достларниң бири Ғәнимҗан Мәмир оғли Әзизов дәп ишәшлик ейталаймән.
Ғәнимҗан билән шәхсән өзәм 1979-жилдин бу ян тонуш, бир мәшрәп әзалиримиз. Ғәнимҗан җавапкәрликни чоңқур һис қилидиған, әмгәкчан, көңли пак, достларға садиқ, қериндашлириға көйүмчан, һәр нәрсигә пәм-парасәт билән яндишидиған хисләтлири билән пәриқлиниду. Йәнә бир тәкитләйдиған нәрсә, у гезит-журнал,китапларни интайин көп оқуйду. «Уйғур авазиниң» турақлиқ оқуғучисила әмәс, җанлиқ тәрғибатчиси, һәр жили муштири топлаш башланғанда әл-ағинилирини миллий нәширлиримизгә йезилишқа дәвәт қилиду, бепәрваларға әһмийитини чүшәндүриду. Қисқиси, миллий ғурури үстүн.
У һәм һүнәрвән инсан, қолидин нурғун нәрсә келиду, шундақла йәргә әҗир қилишниму билиду. Яз күнлири өйигә кәлсиңиз, кичиккинә һойлисида рәңму-рәң қизилгүлләрниң ечилип, хуш пурақ чечип турғинидин һөзүрлинисиз. Достлириниң хошаллиқлирида бир дәстә гүл тизип, соға қилишниму унтумайду. Вақит тапса, әл-ағинилири билән муңдишип-сирдишип олтиришни халайду, өзи һәм шахмат ишқивази, мундақ ейтқанда, Ғәнимҗан бир сирлиқ, көп қирлиқ достларниң бири. Жутдашлириниң ейтишлириға қариғанда, мундақ хисләтләр униңға удумидин дариған болса керәк.
Ғәнимҗан әсли алмутилиқ, ениғирақ ейтқанда, султанқорғанлиқ. Мәзкүр жутта 1937-жили дунияға кәлгән униң балилиқ, яшлиқ чағлири еғир дәвирләргә — уруш вә униңдин кейинки қалақлашқан хәлиқ егилигини тикләш жиллириға тоғра кәлдидә, шу еқим долқунлириға урулуп тавланди. Ата-аниси Мәмир ака билән Султанхан һәдә наһайити әмгәкчан, сәрәмҗан, һүнәрвән кишиләрдин болған екән. Улар өткән әсирниң оттузинчи жиллири Султанқорғанда «Парижская коммуна» колхозини тәшкил қилғучилардин болуп, униң ихтисадини риваҗландуруш йолида әмгәк қилди. Пәрзәнтлириниму заманға лайиқ тәрбийиләп, оқутушқа көңүл бөлди. 1954-жили Ташкәнт шәһиридики Төмүр йол институтини инженер мутәхәссислиги бойичә тамамлиған тунҗа қизи Гүлшәм Исмәтова биринчи Алмута төмүр йол башқармисида рәһбирий лавазимларни шәрәплик атқуруп, бу саһаниң тәрәққиятиға мунасип үлүшини қошти. Һазир Гүлшәм һәдә жутниң инавәтлик мөтивәри. У яқниң әмгәк йоли инисиғиму үлгә болди.
Ғәнимҗан мәһәллисидики уйғурчә йәттә жиллиқ, андин кейин русчә оттура мәктәпни пүтәргәндин кейин, һәдисиниң мәслиһити билән Алмута Төмүр йол башқармисида әмгәк паалийитини башлайду, алақә инженери болуп ишләйду, бир чәттин Ташкәнт Төмүр йол институтини сирттин оқуп түгитиду. Ишләш җәриянида учрашқан еғирчилиқ-қийинчилиқларға бәрдашлиқ берип, дайим яхшилар сепидин орун алиду, көплигән мәнивий вә маддий мукапатлар билән тәғдирлиниду. Шундақла җәмийәтлик ишларғиму паал арилишиду.
Ғәнимҗанниң һөрмәтлик дәм елишқа чиққиниға он бәш жил бопту. У бу жилларниму беһөддә өткүзүватқини йоқ, өзи яшаватқан чоң мәһәллиниң җәмийәтлик вә жутдарчилиқ ишлириға йеқиндин арилишиватиду. Ғәнимҗанниң мәшрәп әһли арисидиму абройи үстүн. Достлар арисида шәкилләнгән нәмунилик әнъәниләрни униңсиз тәсәввур қилишқа болмайду. Бу җәһәттин вападар рәпиқиси Өмүрнисәмниң сиңириватқан әмгәк-әҗри аз әмәс. У яқму әмгәктә тонулған ана, узун жиллар сода саһасида ишлиди, җүмлидин шәһәрдики чоң сода орни — «Детский мир» дукининиң мудири хизмитини атқурди. Һазир улар жуттики ибрәтлик аилиләрниң бири.
Жүгрүк жиллар Ғәнимҗанниму һаятиниң шанлиқ 75-мәнзилигә елип кәлди. Шу мунасивәт билән униңға мустәһкәм саламәтлик, изгүлүк тиләймиз.
Абдукерим ТУДИЯРОВ.
Алмута шәһири.
263 рет
көрсетілді0
пікір
Алдыңғы мақала
«Байлиғим — балилирим, нәврилирим...»
Келесі мақала
Көпчилик ғемида жүргән инсан
ПІКІР ҚАЛДЫРУ
Сіздің электронды пошта жарияланбайды. Қатарды міндетті түрде толтырыңыз *