- Спорт
- 09 Қараша, 2012
Вилайәт шәнини қоғдиди
Өткән айниң ахирқи үч күни мабайнида, Талдиқорған шәһиридә нака спортчилар пауэрлифтинг бойичә болуп өткән мусабиқида җумһурийәт кубоги үчүн күч синашти. Униңға сәккиз вилайәтниң спортчилири қатнишип, Уйғур вә Кербулақ наһийәлири билән Текели вә Қапчиғай шәһәрлириниң он икки спортчисидин тәркип тапқан талланма команда Алмута вилайитиниң шәнини қоғдиди.
Мусабиқә йәкүни бойичә Алмута вилайитиниң спортчилири умумһесап бойичә биринчи орунни егиләп, җумһурийәт кубогини йеңивалди. Бу утуққа еришишкә наһийә спортчилириниң маһирлиғи чоң зәмин яратти. Атап ейтсақ, өз салмақ дәриҗилири бойичә Адилҗан Баутов, Рәхмәтҗан Һәмәев вә Раушан Қойшибаева — биринчи, Гүлдана Нуралиева, Елнур Қашқынов вә Нодәрҗан Һәмруллаев иккинчи орунларни йеңивелип, Қазақстан Җумһурийити Спорт вә тәнтәрбийә ишлири бойичә агентлиқниң Пәхрий ярлиқлири билән мукапатланди.
Кәлгүсидә бу талланма командиниң бир түркүм спортчилири җумһурийәтниң миллий талланма командиси тәркивигә киргүзүлүп, хәлиқара мусабиқиларға қатнишидиған болди. Қизлар командисидин — икки, оғуллар командисидин үч спортчимиз әйнә шулар җүмлисидиндур. Буниңдин сәл илгири спорт маһирлири Адилҗан Баутов, Рәхмәтҗан Һәмәев вә Нодәрҗан Һәмруллаев Қирғиз Җумһурийитиниң Чолпон-Ата шәһиридә оқуш-мәшиқлиниш тәйярлиғидин өтүп кәлгән еди. Тәғдирниң тәқәзаси билән тени қол һарвуға теңилған йеза балилириниң дилиға үмүт чириғини йеқип, уларниң спорт алимидә бүйүк чоққилардин көрүнүши үчүн көп күч чиқириватқан вилайәт һакими йенидики накалар спорт клуби рәһбәрлигиниң, наһийәлик спорт вә тәнтәрбийә бөлүми билән устаз-мәшиқләндүргүчи Алимҗан Сулаймановниң әмгигини мәмнунийәт билән тилға елишқа әрзийду. Амма уларниң шагиртлар утуқлиридин хошаллиққа бөләнгинидин көрә, көпирәк кәлгүси мусабиқиларға қатнишиш үчүн һамийларни издәш билән аварә болуп жүргини адәмни әпсусландуриду.
Махмут ИСРАПИЛОВ.
Уйғур наһийәси.
304 рет
көрсетілді0
пікір
