- Йеңилиқлар
- 19 Қараша, 2012
Тәғдиримни өзгәрткән «Уйғур авази»
Қазақстан мәтбуатиниң карван беши болған «Егемен Қазақстан» гезитида ишләватимән.
Мениң қазақ мәтбуатиға келишимгә «Коммунизм туғи» гезити (һазирқи «Уйғур авази») сәвәп болди. Һелиму ядимда, 1968-жили йеқин достум, язғучи, мәрһум Һәбиб Исмайиловниң өйигә кәлсәм, у «Коммунизм туғи» гезитини қолиға тутувелип, хошаллиғидин қин-қиниға патмай олтирипту. «Адаш иккимизгә иш таптим, — дәп сөзини давам қилди у течлиқ-аманлиқтин кейин. — Йеқин арида «Коммунизм туғи» гезитиниң қошумчиси ретидә әрәп йезиғида «Йеңи һаят» гезити йоруқ көридекән. Шуниңға гезит рәһбәрлиги Ленинградтики (һазирқи Санкт-Петербург) полиграфиялик техникумға уйғур яшлирини оқушқа әвәтишни ойлаштуруветипту».
Һәбиб иккимиз дәрһал редакциягә қарап йол туттуқ. У йәрдә бизни гезитниң җавапкәр кативи, мәрһум Камил Василов қучақ йейип қарши алди. Хаталашмисам, шу вақитта биз үч жигит вә төрт қиз оқушқа атланмақчи болдуқ. Амма мени шу арилиқта һәрбий хизмәткә чақиртип, мән оқушқа баралмай қалдим. Қизиқ йери, һәрбий хизмитимни өтәп болуп, йәнә уттур шу «Коммунизм туғи» гезитиға йолуқтум. Шу жили «Йеңи һаят» гезити йоруқ көрүшкә башлиған екән. Мән мәзкүр гезитқа бәт ясиғучиниң ярдәмчиси болуп ишқа орунлаштим. Москвадики полиграфиялик техникумға һөҗҗәтлиримни тапшуруп, уни сирттин тамамлидим. Кейин Алмутидики рус тиллирида нәшир қилинидиған «Железнодорожник», «Голос» гезитлирида ишлидим. 1977-жили «Социалистик Қазақстан» (һазирқи «Егемен Қазақстан») гезитиға авуштум. Мана, 35 жилдин бу ян мошу нәширдә ишләп келиватимән. Шуңлашқа мән өзәмниң бәхтини нәқ мошу саһадин таптим дәп һесаплаймән. Униңға түрткә болған «Уйғур авази» гезити мениң үчүн интайин қәдирлик.
Һазир иш орнум елимиз пайтәхти — Астана шәһиридә болғачқа, алмутилиқ дост-бурадәрлиримни, қериндашлиримни бәк сеғинимән. Амма һәр җүмә күни сөйүмлүк гезитим «Уйғур авазини» қолумға алғинимда, худди шуларни көргәндәк хошал болуп кетимән. Бу гезит әйнә шундақ жирақ-йеқинда яшаватқан уйғурларниң роһий услуғини қандуруп келиватқан нәшир.
Җамалдин ӘХМӘТОВ,
«Егемен Қазақстан» гезитиниң техникилиқ муһәррири.
632 рет
көрсетілді0
пікір
