- Йеңилиқлар
- 23 Қараша, 2012
Шерикликниң йеңи басқучи
Чаршәнбә күни Қазақстан Президенти Нурсултан Назарбаев иш бабидики сәпәр билән Франциягә келип, мошу мәмликәтниң президенти Франсуа Олланд вә бир қатар көрнәклик сәясәтчиләр һәм ихтисатчилар билән учрашти. Учришиш давамида мәсилиләрниң кәң даириси, җүмлидин Астанада селинидиған метро лайиһиси муһакимә қилинди.
— Биз кәлгүсидиму алақилиримизни, һәмкарлиғимизни давамлаштуруш үчүн Франция Җумһурийитиниң йеңи сайланған президенти билән учраштуқ, — дәп тәкитлиди Нурсултан Назарбаев Франсуа Олланд билән жүргүзгән музакириләрдин кейин. — Биз 27 чоң лайиһини әмәлгә ашурдуқ, товар айлиними 6 миллиард, Францияниң Қазақстан ихтисадиға бөлгән инвестицияси 10 миллиардқа йәтти.
Президент Қазақстан вә Франция рәһбәрлириниң барлиқ бирләшкән лайиһиләрни әмәлгә ашуруш үчүн «Назарбаев — Олланд» комиссияси дәриҗисидики учришишларниң давамлишидиғанлиғини қошумчә қилди.
Униңдин ташқири, Дөләт рәһбәрлири Қазақстанниң Франция әскәрлирини Авғанстандин елип чиқишқа ярдәм қилиш мәсилилирини муһакимә қилди.
— Бизниң ихтисат вә сәясәт, мәдәний-маарип саһалиридики һәмкарлиғимиз һәр икки мәмликәт мәнпийәтлири үчүн давамлишиду, дәп ойлаймән, — дәп билдүрди Нурсултан Назарбаев.
Шу күни Қазақстан Президенти Францияниң көрнәклик сәясәтчиси вә ихтисатчиси, Европа реконструкция вә тәрәққият банкиниң сабиқ башлиғи Жак Аттали билән учрашти. Сөһбәт давамида Қазақстан вә Францияниң малийә-инвестиция, сода-санаәт һәм башқа саһалардики өз ара һәрикәт қилиш йоллири қаралди. Еқимдики хәлиқара вәзийәт асасидин Европа Иттипақи әллирини сәясий ихтисадий тәрәққий әткүзүш мәсилилири, шундақла дуния ихтисадики сәлбий тенденцияләр проблемиси һәм уларни йоқитиш истиқбали муһакимә қилинди.
Нурсултан Назарбаев шундақла «Альстом» ширкәтләр топиниң президенти Патрик Крон билән учрашти. Тәрәпләр бирлишип электровоз ишләп чиқириш вә йеқин келәчәктә Астанада қураштуруш заводини ечиш истиқбалини қарап чиқти. «Альстомниң» Астанада селинидиған метро лайиһисини ишләп чиқиш билән шуғуллинидиғанлиғи билдүрүлди.
539 рет
көрсетілді0
пікір
