• Дидар ғенимәт
• 14 Желтоқсан, 2012

Йерим әсирдин кейин учраштуқ

Буниңдин 50 жил муқәддәм тәғдир тәқәзаси билән чегара атлап, тарихий вәтинимиздин Кеңәш Иттипақиға көчүп чиқтуқ. Қорғасниң Мазар йезисидин биз демәтлик жигит-қизлар чегаридин қол тутушуп өтүп, андин йәнә тәғдир демәкчи, һәр қайсимиз һәр яққа кәттуқ. Алдимиз Өзбәкстан, Қирғизстан җумһурийәтлиридин өзимизгә пана издидуқ. Көпчилигимиз мошу Қазақстан диярида қалдуқ. Мана, әйнә шу жүрәкләрни моҗуйдиған күнләрниң арқида қалғиниға бийил йерим әсир бопту. У вақитларда биз, жигирмә, жигирмидин ашқан жигит-қизлардин болсақ, һазир чечимиз ақирип, чишимиз сарғайди. Бийил Алмута шәһириниң Достлуқ мәһәллисидә истиқамәт қилидиған Аблиз Һенипахунов иккимиз мазарлиқ жутдаш вә синипдашларниң бешини йәнә бир қетим қоштуқ. Буниңдин төрт жил илгири әйнә шу синипдашлар учришип, Алмутида 50 жиллиқ учришишниң мәслиһәт чейини өткүзгән едуқ. У вақитта бу баш қошушқа 52 адәм қатнашқан еди. Бу қетим сепимиз хелила шалаңлишип қапту. Достларниң йерими йоқ. Учришиш әйнә шу һаяттин өткән ағинә-өңгиләрни әскә елиштин башланди. Дәстиханға риясәтчилик қилиш вәзиписи синипдишимиз Яқуп һаҗим Аюповқа тапшурулди. Риясәтчи дәсләпки сөзни устазимиз Һакимҗан әпәндигә бәрди. У өз сөзидә буниңдин әллик жил илгири мәктәп босуғисида болған әстә қаларлиқ вақиәләрни ейтип бәрди. Шуниңдин кейин сөзгә чиққан ташкәнтлик достумиз Һаким Өмәров, бишкеклиқ Әли Авакриев, алмутилиқ Ялқунҗан Йүсүпов вә башқилар өткән-кәчкәнни әскә елишип, мәзкүр учришишни уюштурғучиларға өзлириниң миннәтдарлиғини изһар қилди. Балилиғимизни, яшлиғимизни биллә өткүзгән ағиниләрниң бу соруни хелә узаққа созулди. Аримизда нахша ейтип, уссул ойниғанларму болди. Бәзи синипдашларниң һәзил-чақчақлириму бизгә арамбәхш дәмләрни һәдийә қилди. Сорунимизни нахша-саз билән техиму қиздуруп бәргән «Яркәнт булбуллириниң» жигитлири хәлиқ нахшилирини ейтқанда, туғулуп өскән жутни әскә елип,  көзләрни бираз нәмлидуқ. Ахири синипдашлар бир-биримизни қиймай хошлаштуқ...

Турсунмәһәмәт ЙҮСҮПОВ.

Алмута шәһири. СҮРӘТТӘ: синипдашлар хатирә сүрәткә чүшти.