• Йеңилиқлар
• 14 Желтоқсан, 2012

Улуқ батурға ядикарлиқ орнитилди

Йеқинда Алмутида қазақ хәлқиниң улуқ батури, миллий азатлиқ үчүн күрәшкән Райымбекниң ядикарлиғи ечилди. Монумент Райымбек проспекти билән Пушкин кочисиниң дохмушиға орнитилди. Мәрасимда сөзгә чиққан Алмута шәһириниң һакими Ахметжан Есимов мәмликәт президентиниң тәшәббуси билән әмәлгә ашурулуватқан «Мәдәний мирас» программиси түпәйли хәлиқниң мәдәний мирасиниң кәң даиридә үгиниливатқанлиғини, миллий тарих үчүн алаһидә әһмийәткә егә тарихий-мәдәний вә мемарчилиқ ядикарлиқлирини әслигә кәлтүрүш ишлириниң жүргүзүлүватқанлиғини тәкитлиди. Йеңи ядикарлиқ бронзидин ясилип, қизил гранит супиға орнитилди. Униң егизлиги 12 метр 20 сантиметр. Ядикарлиқниң муәллиплири — һәйкәлтараш Едиге Рахмадиев, дизайнер Игорь Поляков вә мемар Владимир Немчиков. Шуни тәкитләш керәкки, һазир Алмутиниң мәркизий кочилириниң бири, шәһәр йенидики йеза, Алмута вилайитидики наһийә вә җәнубий пайтәхт метрополитени станциялириниң бири улуқ батур Райымбекниң исми билән атилиду. Нурғиса Елеубеков чүшәргән сүрәт.