- Йеңилиқлар
- 28 Қаңтар, 2013
Президент қобул қилди
15-январь күни Дөләт рәһбири Нурсултан Назарбаев Парламент Сенатиниң Рәиси Қайрат Мәмини қобул қилди, дәп хәвәрләйду Қазақстан Җумһурийити Президентиниң мәтбуат хизмити.
Учришиш давамида Қ.Мәми Сенатниң бийилқи жилға беғишланған қанун чиқириш хизмитиниң реҗилири вә Дуниявий вә әнъәнивий динлар лидерлириниң қурултийи хизмитиниң он жиллиғиға беғишлинип өткүзүлидиған чарә-тәдбирләргә тәйярлиқниң кетип бериши тоғрилиқ хәвәрлиди.
Шундақла Сенат Рәиси Парламентниң жуқарқи палатиси реҗисиниң Дөләт рәһбириниң «Қазақстан-2050» Стратегияси Қазақстан хәлқигә йоллиған Мәктүбидә алға қоюлған вәзипиләрни әмәлгә ашурушқа уттур мунасивәтлик екәнлигини, шундақла мәлум өзгириш вә толуқтуруш киргүзүшни һаҗәт қилидиған нормативлиқ-һоқуқий актларниң ениқлиниватқанлиғини ейтип өтти.
Буниңдин ташқири, Сенат Рәиси депутатларниң елимиз регионлиридики аһали билән учришишларни өткүзүватқанлиғи тоғрисидиму әхбарат бәрди.
***
Шу күни Дөләт рәһбири Нурсултан Назарбаев Ақтөбә вилайитиниң һакими Архимед Мухамбетовни қобул қилди, дәп хәвәрлиди Қазақстан Җумһурийити Президентиниң мәтбуат хизмити. Қазақстан Президенти Ақтөбә вилайити елимиздики әң чоң регионларниң бири екәнлигини атап өтти. Нурсултан Назарбаев вилайәтни иҗтимаий-ихтисадий тәрәққий әткүзүшниң әһмийәтлик екәнлигини тәкитлиди вә йәрлик инфрақурулумға, атап ейтқанда, қурулуш билән йол ясашқа, турғунларни газ вә су билән тәминләшкә, мәктәп, ағриқхана вә башқиму иҗтимаий объектларни селишқа көпирәк көңүл бөлүш һаҗәтлигини тәкитлиди. А.Мухамбетов Ақтөбә вилайитиниң 2013-жилға беғишланған иҗтимаий-ихтисадий тәрәққияти вә регионда индустриаллиқ-инновациялик тәрәққият программисиниң орунлишиниң кетип бериши тоғрилиқ әхбарат бәрди. Шундақла вилайәт һакими җумһурийәтлик Индустрияләштүрүш хәритисигә киргүзүлгән әң чоң лайиһиләрни әмәлгә ашуруш тоғрилиқ ейтип өтти. Әйнәк, рельс, газни қайта ишләйдиған вә феррасплав заводлириниң қурулушлири шулар җүмлисидиндур. Бүгүн Индустрияләштүрүш хәритиси даирисидә Ақтөбә вилайитидә баһаси 633,8 миллиард тәңгилик 76 лайиһә әмәлгә ашурулмақта. Улар пайдилинишқа берилгәндә 10 миңдин ошуқ йеңи иш орни ечилиду дәп планланмақта. Умумән, регионниң иҗтимаий-ихтисадий көрсәткүчи оттура җумһурийәтлик дәриҗидин жуқури туриду. Мәсилән, санаәт ишләпчиқириши 1 триллион 315 миллиард тәңгини тәшкил қилди. Қурулуш ишлириниң көләми 23 пайизға ашти, регионда 430 миң квадрат метр турушлуқ өй пайдилинишқа берилди, бу өткән жилқи көрсәткүчтин 4,7 пайиз ошуқ. Буниңдин ташқири Ақтөбә вилайитигә 430 миллиард тәңгә инвестиция җәлип қилинди, униң йерими чәт әллик уттур инвестицияни тәшкил қилиду. Учришишниң нәтиҗиси бойичә Дөләт рәһбири вилайәттә индустриялик-инновациялик тәрәққият программисини әмәлгә ашуруш җәриянини алаһидә назарәт қилиш лазимлиғини тапшурди.
421 рет
көрсетілді0
пікір
