- Замандаш
- 29 Қаңтар, 2013
ИРАДИСИ ТӘҒДИРИНИ ТИЗГИНЛӘП
Ялқунлуқ шаир Лутпулла Мутәллип күйлигәндәк, һәқиқәтәнму вақит наһайити алдираңғу екән. Күнләр бир-бирини қоғлап, һәш-пәш дегичила йешимизму хелә йәргә берип қапту. Ширинбүви иккимиз техи нәвақтила яп-яш әмәсмедуқ. Кичиккинә балилиримизни әгәштүрүп жүрәттуқ. Һә, бүгүнчу? Бүгүн биримиз нәврә сөйсәк, биримиз чәврә көрүп, мома атилиптимиз...
Ширинбүви Җәлилова «Коммунизм туғи» (һазирқи «Уйғур авази») гезити редакциясигә ишқа орунлашқинида, «Төрт пәрзәндим бар, иккиси қиз, иккиси оғул», дәп өзини тонуштурған еди. У чағда өзи хелила яш көрүнгәчкә, униң бу сөзлиригә һеч қайсимизниң ишәнгүси кәлмигән. Аримиздики яш пәрқигә қаримастин, мән уни һәдә демәй, исмини атап достлишип кәттуқ. Бара-бара достлуғимиз техиму мустәһкәмләнди.
Уйғур наһийәсиниң Довун йезисида момиси Зивәрханниң қолида чоң болған Ширинбүви йәттинчи синипни тамамлиған жили улар Чонҗа йезисиға көчүп келиду вә шу йәрдики оттура мәктәпни түгәткәндин кейин, Яркәнт шәһиридики педучилищеға оқушқа чүшүп, уни муваппәқийәтлик тамамлайду. Андин яркәнтлик Адил исимлиқ жигит билән аилә қуруп, төрт пәрзәнт сөйди. 1984-жили аилә шараитиға бағлиқ Алмутиниң Султанқорған мәһәллисигә көчүп кәлди. Мошу тәвәррүк жутқа орунлашқанда, балилириниң чоңи техи он алтә, кичиги бәш яшта еди. Һеч нәрсә оңайлиқ билән қолға кәлмәйду. Бирақ, Алла таала униңға сунмас ирадә һәдийә қилған екән. Шу күчлүк ирадисиниң арқисида тәғдир уни қанчә қамчилисиму, тиз пиктүрәлмиди. Достум бу өмүрдә һалавәткә қариғанда, толарақ җапа тартти. Күндилик турмуш ғеми уни ишләшкә мәҗбурлисиму, билим елишқа нисбәтән қизиқишини йоқатмиди. Шу түпәйли иштин қол үзмәй, дәсләп Қазақ педагогика институтида икки жиллиқ курста, кейинирәк Киров (һазирқи Әл-Фарабий) намидики Қазақ Дөләт университетиниң журналистика факультетида тәһсил көрди. Университетта униң билән оқуған жилларда мән достумниң мисалидин арман билән ирадиниң, интилишниң инсан тәғдиридә қанчилик роль ойнайдиғанлиғиға көз йәткүзгән едим.
Өткән әсирниң 90-жиллири Алмута вә униң әтрапидики мәһәллиләрдә уйғур синиплирини ечиш, уларға муәллимләрни җәлип қилиш җәрияни қизғин овҗ алған еди. Шуларниң қатарида өз вақтида башланғуч синип муәллими болуп ишлигән Ширинбүви редакциядин кетип, шәһәрдики 57-рус оттура мәктивидә ечилған уйғур синипиға муәллим болуп ишқа орунлишиду. Амма оқуғучилар саниниң йетишмәслиги сәвәвидин мәзкүр синип бир аз вақиттин кейин йепилип қалиду. Шу чағда қазақ тилини мукәммәл өзләштүргән Ширинбүви мошу мәктәптә қазақ тили пәниниң муәллими сүпитидә паалийитини давамлаштуриду.
Ширинбүви Җәлилова 2006-жилдин башлап «Азия бүгүн» гезитида, кейинирәк уйғур ханим-қизлириға беғишланған «Интизар» журналида ишләп, көплигән мақалиларни язди. Шундақла чоң-кичик һекайилири билән оқурмәнләрниң қәлбидин орун елип, уларниң иллиқ инкасиға егә болди. Мошу йәрдә Ширинбүвиниң җәмийәтлик паалийити һәққидиму гәп қилишқа әрзийду. У узун жиллар давамида Султанқорған мәһәллисидики Ханим-қизлар кеңишиниң әзаси сүпитидә актив паалийәт көрситип кәлмәктә. Буниңдин ташқири «Мейірімді қолдар» хәйрихаһлиқ фонди рәисиниң орунбасари сүпитидә тилға аларлиқ ишларни әмәлгә ашурушта алаһидә җанпидалиқ көрсәтмәктә. Һаятниң аччиқ-чүчүк тәмини тартип, әндигинә шүкри кәлтүрүп жүргән күнлириниң биридә, техи әндила 36 яшқа толған оғли Бәхитҗан туюқсиз вапат болиду. Ана үчүн буниңдин артуқ җудалиқ болмиса керәк. Һаятниң мундақ еғир зәрбисигә учриған достум оғлидин ялдама болуп қалған, чоңи алтигә, кичиги әндила үч яшқа киргән омақ үч қиз нәврисини бағриға бесип қалди.
Ширинбүви йеқинда өзиниң 65 яшлиқ тәвәллудини қарши алди. Әзиз қаяшимға қалған өмриңиздә қәлбиңиз һеч азар көрмисун, пәрзәнтлириңиз билән он бир нәврә, йеңидин һаятқа көз ачқан чәвриңизниң қизиғини көрүшкә Алла несип қилсун. Тәғдириңизни тизгинлигән ирадиңиз сунмисун. Иҗадийәттә қәлимиңиз талмисун! дегән изгү тиләкләрни изһар қилғум келиду…
Нурванәм ӨМӘРОВА.
Алмута шәһири.
820 рет
көрсетілді0
пікір
