- Висал
- 12 Наурыз, 2013
МОМАЙЛАР
Қерилиқ дәстидин егилип белиң,
Путлашсаң йөләкчиң — қолуңда таяқ.
Қисқираш орниға узирип йолуң,
Алдиңға тәмтиләп басисән аяқ.
Иззитим, һөрмитим саңа беқияс,
Жилларға бой бәрмәй жүргиниң үчүн.
Бир өмүр пидаий җәңчигә охшаш,
Пәрзәнтләр постида турғиниң үчүн.
Һеликәм чирайлиқ көрүнүп иллиқ,
Диққитим һәрдайим тартисән жипсиз.
Қолум тутуп һәм сипайә-силиқ,
Көзүңгә шу ан яш алисән тилсиз.
Шу мәһәл қурдишиң анамни әсләп,
Яд әйләп, қайғуруп тинисән дәртлик:
«Нан-чайлиқ болғанда сән оқуп-ишләп,
Көрәлмәй кәтти, хәп, дәйсән рәмәтлик».
Көрәлмәй учқиним кәтти анам раст,
Һеликәм анамни көргәнләр қалди.
Пәрзәнди ишқида болуп мәйсиз мәс,
Балисин әзизләп жүргәнләр қалди.
Алдиға әркиләп кәлсәм мән бәзән,
Ләвзини аңлашқа мисали анам.
Көксүмни көйдүрүп җудалиқ сезим,
Көзүм алдида туриду анам.
Һәр өйгә яришип туриду туғдәк,
Бешиға ақ яғлиқ таққини үчүн.
Қучиғи жипсизла тартиду чоғдәк,
Анамниң көзигә баққини үчүн.
Қәдиру-қиммити һәммидин улуқ,
Һәр өйниң сөлити — әнсиз момайлар.
Чирайиң көргәндә йерим көңлүм тоқ,
Анамдәк меһриван әзиз момайлар!
Илахун ҺОШУР.
432 рет
көрсетілді0
пікір
