- Висал
- 12 Наурыз, 2013
«ИШБИЛӘРМӘН АЯЛЛАР» КЛУБИҒА — ЙӘТТӘ ЖИЛ
Бийил җумһурийәт даирисидә хәйрихаһлиқ паалийәт билән шуғуллиниватқан «Ишбиләрмән аяллар» клубиниң тәшкил қилинғиниға йәттә жил болди.
Йеқинда ишбиләрмән ханим-қизлар «Қәшқәр» этноресторанида өзлириниң һесават жиғинини өткүзди.
— Бүгүнки күндә клуб әзалириниң сани оттуздин ашти, — дәйду мәзкүр клубниң рәиси Клара Турсун қизи. — Өтмүшсиз келәчәк йоқ демәкчи, биз баштила уруш вә әмгәк ветеранлирини маддий вә мәнивий җәһәттин қоллап-қувәтләшни қолға алдуқ. Ветеранлиримизниң сани күндин-күнгә шалаңлишип, улар бармақ билән санавалғидәкла қалди. Уларниң роһини көтириш бизниң асасий вәзипимиз.
Әнди йәнә бир асасий мәхситимиз — уйғур мәктәплиридә билим еливатқан балилиримизниң һәртәрәплимилик билим елиши үчүн уларға шараит яритиш. Йеңи оқуш жилиниң башлиниши билән Алмутидики уйғур мәктәплиригә маддий җәһәттин ярдәмлишиватимиз.
Униңдин башқа «Ишбиләрмән аяллар» клубиниң әзалири тәминати төвән аилиләргиму ярдәм қолини сунмақта. Шундақла улар һәр жили бир-икки қизниң алий оқуш орниға чүшүшигә ярдәм қилип, уларни маддий җәһәттин қоллап-қувәтләватиду.
— Елимиз Президенти Н.Назарбаев һәр жили Қазақстан хәлқигә йоллиған әнъәнивий мәктүплиридә аялларниң җәмийәттики ролини ашурушқа алаһидә көңүл бөлүш һаҗәтлигини ейтмақта, — дәп сөзини давам қилди Клара Турсун қизи. — Бизму көпмилләтлик елимизда хәлиқләр достлуғини мустәһкәмләш йолида әмгәк қилидиған ханим-қизларни тәрбийилишимиз керәк. Бүгүнки күндә биз келәчәктә ишимизни давамлаштуридиған варисларға муһтаҗ.
Ахирида Клара Турсун қизи «Ишбиләрмән аяллар» клубиниң әзалири Гүлчеһрә Искәндәрова, Римма Злавдинова, Адаләт Насирова, Ирадә Тохтасунова, Меһрибанәм Розиева, Роза Шахарова, Турсунай вә Нурванәм Низамединоваларниң паалийәтчанлиғини алаһидә тилға елип, уларға өзиниң миннәтдарлиғини изһар қилди.
СҮРӘТТӘ: Р.Злавдинова (солдин оңға), К.Шардинова вә А.Насирова.
648 рет
көрсетілді0
пікір
