- Концерт
- 15 Наурыз, 2013
Һәм күлдүрди, һәм ойландурди
Қ.Ғоҗамияров намидики җумһурийәтлик дөләт Уйғур музыкилиқ комедия театри һәрхил концерт, спектакльлар арқилиқ өз тамашибинлириниң көңлини елишқа дайим тиришип кәлмәктә. Шундақ болсиму, ушбу сәнъәт дәргаһиниң сәһнисидә көпчиликниң диққитигә тәғдим қилиниватқан қоюлумларниң һәммисинила утуқлуқ чиққан, дәп ейталмаймиз. Амма, 8-март — Хәлиқара аяллар күнигә мунасивәтлик уюштурулған «Ана билән һаят гөзәл» намлиқ мәйрәмлик концертниң көп җәһәттин тәл-төкүз чиққанлиғини алаһидә мәмнунийәт билән тилға алғумиз келиду. Мәсилән, пәрдә ечилиши биләнла сәһниниң безилиши өзиниң нәпислиги вә җилвикарлиғи түпәйли барлиқ тамашибинларниң диққитини бирдин җәлип қилди. Бу йәрдә рәссам Гөзәл Мәмединованиң сәһнидә гүл-чечәккә пүркәнгән бепаян далани, ақ булутлар ләйләп жүргән сүзүк самани әкис әттүрүш арқилиқ назук қәлб егилириниң мәйримигә беғишланған концерт маһийитини толуқ ечип беришкә мувәппәқ болғанлиғини тәкитләшкә әрзийду. Пәқәт чәксиз далаға түврүк-колонниларниң орнитилишиниң сәвәвини чүшинәлмидуқ.
Концертқа риясәтчилик қилған артистлар Үмүт Қасимов билән Дилшат Аманбаевму өзлиригә тапшурулған вәзипә һөддисидин шәрәплик чиқти. Әнди иҗра қилинған нахша-сазларға кәлсәк, улар кәспий дәриҗидә орунланғанлиғи, концерт мавзусиға уйғунлуғи билән пәриқләнди. Болупму, бир топ әр артистлар тәрипидин орунланған «Муқәддәс аял» намлиқ нахша тамашибинларни иллиқ һиссиятларға бөләп, гүлдирас чаваклар билән қарши елинди. Мошу йәрдә концерт җәриянида һәрхил уссулларни жуқури маһарәт билән орунлиған қиз-жигитләрниң чаққан һәм әвришимлигини алаһидә мәмнунийәт билән тилға алмақчимиз. Бу йөнилиштә уссулларни сәһниләштүргән Эльмира Сәйдуллаеваниң көп тәр төккәнлиги байқилиду.
Мәзкүр концерт җәриянида қоюлған миниатюриларму көпирәк махташқа мунасип. Болупму атақлиқ күлкә маһири Махмут Дәраевниң қәлимигә мәнсүп миниатюрилар көпчиликни күлкигә ғәриқ қилипла қоймай, тәрбийәвий әһмийити, ойландуридиғанлиғи билән пәриқләнди. Әнди уларни сәһнигә елип чиққан хәлқимизниң сөйүмлүк артистлири Руқийәм Саттарова, Реһангүл Мәхпирова вә Махмут Дәраев бу қетимму өзлириниң ярқин қабилийәт егилири екәнлиги билән тамашибинларниң алқишиға бөләнди. Раст, у күни бәдиий сүпити төвән, сәһнә мәдәнийитигә нуқсан кәлтүридиған, мавзу җәһәттин конириған айрим миниатюриларниңму болғанлиғиға көз жумалмаймиз. Бирақ уларни жуқуридикидәк утуқлуқ чиққан миниатюрилар бесип кәтти.
Умумән, Муһит Һезимовниң режиссерлуғида сәһниләштүрүлгән бу қетимқи мәйрәмлик концерт көпчиликниң тәшналиғини қандурди. Сәнъәткарлиримиз бизни кәлгүсидиму пәқәт шундақ кәспий дәриҗидики қоюлумлири билән хошал қилидиғанлиғиға үмүт артимиз.
Йолдаш МОЛОТОВ.
367 рет
көрсетілді0
пікір
