- Дидар ғенимәт
- 27 Наурыз, 2013
Китапни тонуштуруш ана мәктәптә өтти
Йолдаш Азаматов — көрнәклик язғучи вә журналист. Өткүр қәләм саһиби өзиниң көплигән нәсрий әсәрлири һәм мәдәний-әдәбий һаятимизда муһим вақиәләр болуп қалған «ХХ әсир намайәндилири», «Инсан еди өлүмгә қиймайдиған», «Тарих савақлири яки Өтмүшсиз келәчәк йоқ», «Әң қийин пәйтләрдиму қәдир-қиммитини йоқатмиған» намлиқ қамусий топламлири арқилиқ оқурмәнләр аммисиға яхши тонулған. Йеқинда язғучиниң яшлар һаятиға беғишланған вә буниңдин 30 — 40 жил илгири йоруқ көргән топламлиридин таллавелинған повесть вә һекайилиридин тәркип тапқан «Бизму яш болған» намлиқ китави «Мир» нәшрият өйидә» нәшир қилинди.
Шу мунасивәт билән Яркәнт шәһиридики әдип өз вақтида тамамлиған Х.Һәмраев намидики уйғур оттура мәктивидә мәзкүр китапни тонуштуруш мәрасими болуп өтти. Учришишни кириш сөз билән ачқан Панфилов наһийәлик Уйғур этномәдәнийәт мәркизиниң рәиси Реһимҗан Тохтахунов жут намидин Йолдаш Абдуқадир оғлини тәбрикләп, униңға иҗадий утуқлар тилиди. Меһманға сәпәрдаш болуп кәлгән филология пәнлириниң намзити Рабик Исмайилов, «Бизму яш болған» топлиминиң рәсимлирини сизған көрнәклик рәссам Һашимҗан Қурбанов, шундақла Панфилов наһийәлик билим бериш бөлүми хадимлири кәспий иттипақиниң рәиси Рәхимҗан Илахунов, наһийәлик «Телекоммуникация» тармиғиниң мудири Һакимҗан Йүсүпов, жут мөтивәри Әхмәт Исламов, Ават оттура мәктивиниң муәллими Венера Иминова, Х.Һәмраев намидики мәктәпниң мудири Қәһриман Илахунов, мошу мәктәпниң оқуғучиси Дилназ Һәмраева вә башқиму жутдашлири муәллипкә болған сәмимий тиләк-истәклирини изһар қилди.
Ахирида язғучи жутдашлириға вә өзи оқуған мәктәпниң коллективиға сәмимий миннәтдарлиғини изһар қилип, уларни кәлгүси иҗадий иш-реҗилиридин хәвәрдар қилди.
Нурәхмәт ӘХМӘТОВ.
Панфилов наһийәси. СҮРӘТТӘ: китап муәллипиниң оқурмәнләргә өзиниң қол тамғисини бериватқан пәйти. Бәхтишат СОПИЕВ чүшәргән сүрәт.
430 рет
көрсетілді0
пікір
