- Замандаш
- 29 Наурыз, 2013
ЖУТИҒА ӘМГИГИ СИҢГӘН
Һакимҗан Турсун оғли Йүсүповни әзәлдин яхши билимән. Иккимиз Х.Һәмраев намидики уйғур оттура мәктивини, аридики бир жиллиқ пәриқни ейтмиғанда, биллә тамамлиған десәкму болиду. Та һеликәм, арида қириқ бәш жилға йеқин вақит өтсиму, униң әшу бир оқуғучилиқ чағлиридики тәртип-интизамға қәтъий риайә қилидиғанлиғи көз алдимдин кәтмәйду. Шуңлашқа синипдашлири арисидила әмәс, муәллимләр алдидиму сөзи йәрдә қалмайдиған инавәтлик балилардин еди. Мәктәпни түгитип, йоллиримиз ачилинип кәттидә, у алақә саһасини таллавалди. Аиләвий шараитму яки башқа сәвәпләрму, әйтәвир, мәктәпни әла баһаларға тамамлиғанлиғиға қаримастин, Алмутидики алақә училищесиға оқушқа чүшти. Телеграф-телефон алақисиниң оператори мутәхәссислигини егиләп, әмгәк паалийитини башлиди. Мана шуниңдин бери қириқ жилдин ошуқ вақит мабайнида өз кәспигә болған садақитини йоқатмиған һалда ишләп кәлмәктә. Панфилов наһийәлик алақә тармиғиға ишқа орунлишип, дәсләп почта алақисини пайдилиниш хусусидики назарәтчи, андин инструктор охшаш хизмәтләрни атқурди. Төрт жил өткәндин кейин, йәни 1976-жили мәһкимә башлиғиниң орунбасари болуп тайинланди. Бу жигирмә үч яшқа әндила толған яш мутәхәссискә көрситилгән жуқури ишәнчә еди. Униң үстигә, наһийә территорияси һәм аһалиси җәһәттин вилайәттики әң чоң наһийәләрдин болғачқа, буниңдин ташқири, чегара бойиға җайлашқанлиқтин, җавапкәрчиликму аз әмәс еди. Бирақ наһийә рәһбәрлиги билән коллектив хаталашмиған екән. Һакимҗан Турсун оғли өзигә жүкләнгән вәзипиниң һөддисидин шәрәплик чиқип, ишәнчини толуқ ақлиди.
1983-жилға келип, мәһкимидә йеңи рәһбәр сайлаш зөрүрийити пәйда болди. Мана шу чағда һечқандақ иккилиниш болмастин, униң намзити көрситилип, талаш-тартишсиз йәкдиллиқ билән тәстиқләнди. Шуниңдин бери аридин топ-тоғра оттуз жил өткән болсиму, Һакимҗан Йүсүпов өз намиға дағ чүшәрмәстин, коллективни тәдбирчанлиқ билән башқуруп кәлмәктә. Һазирқи күндә «Қазақтелеком» акционерлиқ җәмийити наһийәлик тармиғи» дәп атилидиған мәһкиминиң тарихи узун, паалийәт даириси кәң. Архив һөҗҗәтлиридики мәлуматлар бойичә, Яркәнт тәвәсидә 1882-жилдин тартип телеграф идариси ишләшкә башлиған екән. 1917-жили телеграф-почта идариси болуп қайта тәшкиллинип, асаслиқ аһалилиқ җайларда сәккиз бөлүмчиси ечилипту. Бүгүнки ихтисадий көрсәткүчлири бойичә башқа әмгәк коллективлири арисида алдинқи сәптә болуп келиватқан мәһкиминиң тарихи әйнә шундақ башланған.
Әлвәттә, бүгүнки телефон алақиси хизмитиниң даириси билән сүпити тәсәввур қилип болмайдиған дәриҗидә тәрәққий әтти. Алақә васитилириниң заманивий үлгилири сүръәтлик риваҗлинип, әмәлиятта җарий қилиниватқанлиғи нәтиҗисидә аһалиниң хизмәтниң бу түригә болған тәләп-еһтияҗи толуқ қанаәтләндүрүлүватиду десәк, ашуруп ейтқанлиқ болмайду. Болупму Қазақстан Җумһурийити өз мустәқиллигигә егә болғандин кейин, бу тәрәққиятниң сүръити алаһидә улғайди. Әгәр рәқәмләргә мураҗиәт қилидиған болсақ, буниң һәқиқәтәнму шундақ екәнлигигә ениқ көз йәткүзәләймиз. Мәсилән, бүгүнки күндә наһийәдики барлиқ аһалилиқ җайлар толуқ телефонлаштурулған. Һәтта санақлиқла адими бар Ақарал, Қизилҗигдә, Сарпилдақ охшаш авул-мәлә турғунлириму бу хизмәттин пайдилиниш имканийитигә егә. Наһийә бойичә 19 рәқәмлик автоматлиқ телефон станцияси арқилиқ шәһәрләр вә хәлиқара алақә имканийити яритилған. Спутник системиси арқилиқ — 2, радиотелефон арқилиқ 4 базилиқ станцияләр ишләватиду. Қорғас, Пәнҗим, Чоң Чиған, Кичик Чиған, Көктал, Қоңурөләң, Головацкий йезилирида хизмәт көрситишни техиму мукәммәлләштүрүш бойичә бирқатар чарә-тәдбирләр әмәлгә ашурулди. Мундақ ишлар бийил Яркәнт шәһиридиму қолға елиниду. Шуни тәкитләш керәкки, паалийәт даириси кәңәйтиливатқанлиқтин, һазир телефон орнитиш мәсилиси толуқ һәл қилинди. Илгәркидәк новәттә туруш йоқ, бүгүн әризә берилсә, әтисидин қалмай қанаәтләндүрүлүп келиватқанлиғиниң гувачиси болуватимиз. Буниңдин ташқири, шәһәр билән барлиқ чоң-кичик йезиларниң һәммисидә беваситә Интернетқа қошулуш мүмкинчилиги моҗут. Барлиқ мәктәпләр билән медицинилиқ мәһкимиләрдә, китапханиларда мошундақ имканийәт яритилған.
Һакимҗан Турсун оғли тәбиитидин кәмтар, кичик пейил адәм. Көп сөздин көрә, әмәлиятқа уйғун аз сөзни яхши көриду. Башқичә ейтқанда, нәқ иш-һәрикәтниң адими. Җәмийәт алдидики бир кишилик борчини чоңқур чүшиниду. Өз саһаси бойичә салаһийәтлик мутәхәссис, тәшкилий қабилийәткә егә тәдбирчан рәһбәр болғанлиқтин, аридин өткән шунчә вақиттин бери өз зиммисидики мурәккәп вәзипиниң һөддисидин шәрәплик чиқип келиватиду. Шуңлашқа наһийәдә аброй-инавити жуқури, исим-шәрипи яркәнтликләр тәрипидин һөрмәт билән тилға елиниду.
Мақалини йезиш җәриянида униң билән учришип, сөһбәтләштим. Жуқурида ейтилғандәк, кәмтарлиғи түпәйлидин өзидин көрә, коллектив тоғрисида көпирәк тохталди. Сәксәндин ошуқ инженер-техник ишләйдиған чоң коллективтики әмгәк илғарлирини пәхирлиниш һәм миннәтдарлиқ билән тилға алди. Җүмлидин Қурванҗан Анайәтов, Тайир Башизов, Төленди Отызбаев, Руқийәм Сайитова, Наталья Резникова, Александр Лазерев, Дилшат Мөмүнов, Райхан Қастеева, Аймағча Арипованиң исимлирини алаһидә атап көрсәтти. Әгәр уларниң алди қириқ, кәйни жигирмә жилдин бери мошу йәрдә ишләп келиватқанлиғини әскә алидиған болсақ, мәһкимидә сағлам муһитниң һөкүм сүрүп, тәшкилчанлиқниң мустәһкәм екәнлигигә көз йәткүзүш қийин әмәс.
Коллективта йәнә бир қелиплашқан ибрәтлик әнъәнә — бу пешқәдәм әмгәк адәмлиригә болған ғәмхорлуқ. Илгири бу йәрдә ишләп, әмгиги сиңгән, һазирқи пәйттә болса, һөрмәтлик әмгәк дәм елишта жүргән хадимларниң һәрқачан диққәт мәркизидин чәттә қалмай келиватқанлиғи һәқиқәтәнму алқишлашқа әрзийдиған иш. Улар турақлиқ рәвиштә маддий вә мәнивий қоллап-қувәтләшкә муйәссәр. Буму рәһбәргә хас болушқа тегишлик пәзиләтләр җүмлисидин.
Һакимҗан Турсун оғли һәққидә сөз қилғанда, ейтмасқа болмайдиған гәп шуки, у мәдәнийитимизниң һәқиқий җанкөйәри. Наһийәлик Уйғур этномәдәнийәт мәркизи тәшкил қилинғандин бери, аридики чарәк әсиргә йеқин вақит җәриянида, униң паалийитигә йеқиндин арилишип, әмәлгә ашурулуватқан чарә-тәдбирләргә сезиләрлик һәссисини қошуп келиватиду. Коллективта шаир-язғучилиримизниң әсәрлирини тәрғип қилип, гезитлиримизға муштири топлашта жүргүзүватқан үлгилик ишлирини тилға алмай мүмкин әмәс.
Мошу күнләрдә Қазақстанниң Пәхрий алақичиси Һакимҗан Йүсүпов 60 яшлиқ тәвәллудини нишанлаватиду. Бу униң билән қириқ жилдин ошуқ вақит медицина саһасида хизмәт қилған рәпиқиси Адаләт Һосман қизиниң яки алий мәлуматлиқ болуп қатарға қошулған үч пәрзәндиниңла хошаллиғи әмәс, бәлки жутниңму хошаллиғидур. Чүнки у һәқиқий мәнасида жутдашлириға хизмәт қилип кәлмәктә. Һә, жутиға хизмити сиңгәнләр болса, һәрқачан қәдирлик һәм инавәтлик.
Нурәхмәт ӘХМӘТОВ.
Панфилов наһийәси.
742 рет
көрсетілді0
пікір
