• Йеңилиқлар
• 26 Сәуір, 2013

Индустрияләштүрүш хәритиси

Ток шамал арқилиқ елиниду Елимиз ихтисадиниң жилдин-жилға тәрәққий етиши аһалиниң турмушини яхшилапла қоймай, индустрияләштүрүш җәриянини сүръәтлик жүргүзүшкиму зор имканийәтләрни яратмақта. Униң рошән испати сүпитидә жираққа бармайла, кейинки жилларда Челәк тәвәсидә пайдилинишқа берилгән, шундақла йеңидин қолға елиниватқан муһим объектларниң қурулушини тилға алсақ купайә. Әнди Челәкниң тохтимай чиқип туридиған шамилини көз алдиңизға кәлтүрүп көрүң. Бәзидә бу шамаллардин безар болғинимиз билән йеқин кәлгүсидә тәбиәтниң бу һадисиси һасил қилған нурлардин бәһирлинидиған болимиз. Гәп Масақ йезисиниң күн чиқиш тәрипигә селинидиған шамал электр станцияси тоғрилиқ болмақта. Ениғирақ ейтқанда, наһийәлик тиҗарәт бөлүминиң башлиғи Сейит Қуланбаевниң тәкитлишичә, бу электр станциясиниң қурулушини ТОО «GREEN ENERGY Алматы» ширкити өз һөддисигә алған. Станция қурулуши үчүн әң қолайлиқ дәп һесапланған 1,5 миң гектар йәр аҗритилған. Бу мәйданға 450 ток ишләпчиқириш үчүн ишлитилидиған чақпеләк орнитилмақчи. Әгәр һәрбир станцияниң қувити бир миговатт болса, демәк, бир мәзгилдә 450 миговатт ток ишләп чиқирилиду, дегән сөз. Бу Мойнақ ГЭСи билән селиштурғанда, хелила нурғун (Мойнақ ГЭСиниң қувити — 370 мегаватт). Мәзкүр электр станцияниң қурулушиға һазир 900 миллион тәңгә миқдарида мәбләғ бөлүнгән. Умумән, станцияниң толуқ қувәттә ишлиши үчүн 5 миллиард 100 миллион тәңгә сәрип қилиниду. Әгәр наһийә даирисидә тәвлүгигә 50 мегаватт токниң истимал қилинидиғанлиғини инавәткә алсақ, шамал қувити билән йетиштүрүлидиған токниң әһмийитини чүшинивелиш тәс әмәс. Униңдин ташқири бийил вилайәт даирисидә жүргүзү­лүватқан «Азия» газ иншаәтлири қурулушиниң 3-тармиғи қолға елинмақчи. Әнди саатиға 120 километр илдамлиқта меңишқа имканийәт яритидиған җумһурийәтлик әһмийәткә егә Ғәрбий Европа — Ғәрбий Хитай автомагистралиниң қурулушиму бийил башланмақчи. Бу йолниң мәлум қисми тәвә территорияси арқилиқ өткәчкә, наһийә ихтисадиға, аһалиниң иш билән тәминлинишигә иҗабий тәсир қилидиғанлиғи сөзсиз.

Мәһәмәтҗан ҺАПИЗОВ.

Әмгәкчиқазақ наһийәси.