• Висал
  • 12 Наурыз, 2012

Ханим-қизлар паалийити җанлиниватиду

«Җәннәт қәйәрдә?» — дәп сориса, Аниниң тапининиң астида», дәп җавап бәргән екән бир данишмән. Һәқиқәтәнму анилар қәдәм басқан йәрдә гүл үниду, шу җайға нур төкүлиду. Әвлат тәрбийиси, милләт сапаси асасән аниларға мунасивәтлик екәнлиги испатлашни тәләп қилмайдиған һәқиқәт. Ана дегәндә алди билән яш әвлат тәрбийисиниң көз алдимизға келидиғанлиғи сөзсиз. Чүнки пәрзәнтлиримизниң сағлам, зерәк, билимлик болуп йетилиши аниларниң салаһийитигә, тәрбийисигә бағлиқ. Шуңлашқа аниларниң әвлат алдидиму, җәмийәт алдидиму атқуридиған роли интайин зор. Миңлиған анилар җәмийәт активистлири, дөләт вә хәлиқ хизмәтчилири сүпитидә елимиз тәрәққиятиға мунасип һәссә қошуп, аләмшумул ишларниң тәшәббускарлири болмақта, иҗтимаий-сәясий саһаларда актив паалийәт жүргүзмәктә. Болупму маарип вә медицина саһалирида паалийәт елип бериватқан ханим-қизларниң сан вә сүпәт җәһәттин жилдин-жилға өсүп, йетилип келиватқанлиғи һәммигә мәлум. Демәк, яш әвлат тәрбийиси вә саламәтликни сақлаш саһаси бойичә аялларға жүклинидиған вәзипиләрниң салмақлиқ екәнлиги өз-өзидин чүшинишлик. Өз новитидә дөләт тәрипидин аниларға алаһидә ғәмхорлуқ көрситилмәктә. Көп балилиқ анилар үчүн «Алтун һалқа», «Күмүч һалқа» бәлгүлириниң тәсис қилиниши, ялғуз аниларға берилидиған маддий ярдәмләр әйнә шулар җүмлисидиндур. Жираққа бармайла, өзимизниң Челәк тәвәсидики ханим-қизларниң атқурған вә атқуруватқан иш-паалийәтлиригә тохтилидиған болсақ, нурғунлиған нәмунилик ишларниң гувачиси болимиз. Атап ейтқанда, хәлқимизниң миллий әнъәнилирини, урпи-адәтлиримизни тәрғип қилишқа вә уларни җанландурушқа, мәдәний-аммивий чарә-тәдбирләрни уюштурушқа өзиниң мол тәҗрибисини, салаһийити билән вақтини сәрип қилип келиватқан анилар көпләп санилиду. Шуларниң ичидә Челәк йезилиқ Ханим-қизлар кеңишиниң рәиси болуп узун жиллар ишләш җәриянида көпчиликниң иззәт-һөрмитигә сазавәр болған Җәннәт һәдә Абдурәшитова, регионлуқ Уйғур этномәдәнийәт мәркизиниң бюро әзаси сүпитидә көплигән муһим иш-чариләрниң тәшәббускари болуп келиватқан салаһийәтлик мутәхәссис Айнисәм Вайдинова, узун жиллар алақә саһасида ишләп һөрмәт қазанған, миллий нәширлиримизниң җан көйәри Хатәм Қавашева, активист аяллардин Зәйтүнәм Сабитова, Сәнәвәр Әһәтова, Патигүл Талипова, Бостан Аюшева, Зоһра Баратова, «Қизил Шәриқ» йезисидики Ханим-қизлар кеңишиниң рәиси Шәмшинур Қәмбәрова, «Қазақстан» йезисидин Пәридәм Семәтова вә башқиму көплигән әл-жут ишқида пәрванә болуп жүргән ханим-қизлиримиз билән һәқлиқ йосунда пәхирлинимиз. Бу күнләрдә региондики әң чоң округларниң бири «Бартоғай» округиниң һакими болуп ишләватқан Гүлпәм Мәмәтованиң тәвә хәлқи алдида аброй-инавити алаһидә. Тиҗарәтчи аяллар Пәридәм Сабирова вә Адаләт Ғазиеваму өзлириниң сахавәтлик ишлири нәтиҗисидә көпчиликниң иззәт-һөрмитигә егә болуп келиватиду. Шуни алаһидә тәкитләш керәкки, Адаләт Һүсәнҗан қизи бийил наһийәлик мәслиһәткә депутат болуп сайланди. Униңдин башқа яш әвлатқа билим берип келиватқан ханим-қизлиримиз билән саламәтликни сақлаш саһасида үнүмлүк ишләватқан тәҗрибилик дохтур қиз-аяллиримиз һәққидә қанчилик иллиқ инкас ейтсақму, әрзийду. Ейтивәрсәк, мундақ мисалларни көпләп кәлтүрүшкә болиду. Мәйрәм күни пәқәт яхшилиқ вә хошаллиқ һәққидә ейтишимиз керәк еди. Лекин, пурсәттин пайдилинип, һаятта пат-пат учришип туридиған бәзи сәлбий көрүнүшләргә қисқичә тохтилип өтүшни тоғра көрүватимән. Мениңчә, айрим яш қизлиримиз һаятқа, өз тәғдиригә наһайити үзә қарайду. Болупму турмуш қуруш мәсилисидә һеч бир ойланмай қечип кетиш нәтиҗисидә ата-анисини, қом-қериндашлирини йәргә қаратқанни аз дәп, аридин бир аз вақит өтүпла «чиқишалмидуқ» дегән сөзни банә қилип қайтип келиду. Бу сөзниң әстиридә қандақ мәсилә ятиду, десиңизчу. Кимниң гунакар болушидин қәтъий нәзәр, бу оттуридики көңүл ағришлар йәнила шу қизлиримизниң өйдә тоғра тәрбийә алмиғанлиғидин, пак сөйгүниң немә екәнлигини билмигәнлигидин келип чиқиду, дәп ойлаймән. Чүнки ата-анини һөрмәтләйдиған әдәп-әхлақлиқ қизларниң һеч қачан туғулуп өскән өйидин қачмайдиғанлиғи ениқ. Мәктәпләрдә оқуш билән тәрбийә ишлири бирдәк жүргүзүлиду. Болупму, жуқарқи синип қизлири арисида мәхсус бәлгүләнгән устазлар бу җәһәттин алаһидә иш елип бариду. Лекин, шуниңға қаримай, бәзи қизлиримиз ойланмай қәдәм басиду. Шуңлашқа һәр икки тәрәптин өйдики тәрбийә тоғра болмиғичә бу илләттин техичә қечип қутулалмайватимиз. Шуңлашқиму, әгәр бала житим, ана тул қалмисун десәк, яшлар тәрбийисигә алаһидә етивар беришимиз керәк. Шу чағдила җәмийәткә лайиқ адәмләрни йетилдүрүп чиқалаймиз. Пурсәттин пайдилинип барлиқ нураний аниларни җәмийәтлик ишларниң бешида жүргән ханим-қизларни мәйрими билән сәмимий тәбрикләймән.

Гүлбәһрәм ҺАШИРОВА,

Челәк йезисидики А.Розибақиев намидики оттура мәктәп мудириниң тәрбийә ишлири бойичә орунбасари, Әмгәкчиқазақ наһийәси Челәк регионлуқ Ханим-қизлар кеңишиниң рәиси.   

 

236 рет

көрсетілді

0

пікір
Алдыңғы мақала Ечилғанни йепип, чечилғанни терип...
Келесі мақала 3 миллион долларлиқ гүлдәстә

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

16 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы