• Көргәзмә
  • 31 Мамыр, 2013

Әр-аял рәссамлар хатирисигә беғишланди

Өткән һәптидә Алмута шәһиридики «Тойота мәркизигә» орунлашқан «Алма-Ата» Арт галереясидә әр-аял рәссамлар Медәт Қаһаров билән Инна Васильеваниң хатирисигә беғишланған көргәзмә ечилди. Өзбәкстан хәлиқ рәссами Қазақстан вә Өзбәкстан сәньәт академиясиниң академиги Медәт Қаһаровниң қериндашлири Сауле вә Әсел Қаһаровалар тәрипидин уюштурулған мәзкүр көргәзминиң ечилиш тәнтәнисидә сөзгә чиққан «Алма-Ата» Арт сәнъәт галереясиниң мудири Мадина Смағулова, сәнъәтшунас Баян Барманқулова, мәдәнийәтшунас Ермек Жангелдин, рәссам Елена Бейсенбинова, көрнәклик уйғур рәссамлири Әхмәтҗан Әһәт, Әркин вә Күрәш Зулпиқаровлар мәрһум әр-аял рәссамлар Медәт Қаһаров билән Инна Васильеваниң тәсвирий сәнъәт саһасиға қошқан бебаһа төһписигә алаһидә тохтилип өтти. Шуниңдин кейин тәнтәнигә қатнашқан меһманлар әр-аял рәссамларниң көргәзмә залиға қоюлған  әмгәклирини көздин кәчүрди. Тәкитләшкә әрзийдуки, көрнәклик уйғур рәссами Медәт Қаһаровниң мой қәлимидин пүтүлгән әмгәкләр адәмләрни ойлашқа, пикир қилишқа чақирғучи бүйүк сәнъәт ишарисигә охшаш җәзбикарлиққа вә чоңқур мәзмунға егә. Униң миллийлик билән умумий инсанийлиқ, әнъәнивийлик билән заманивийлиқ бәлгүлири муҗәссәмләнгәнлиги байқилип туридиған «Қуш базири», «Мәһәллидики түн», «Шәриқ аһаңлири», «Турпан дуэти» кәби әсәрлири алаһидә диққәткә сазавәр. СССР вә Өзбәкстан Рәссамлар иттипақиниң әзаси Инна Васильеваниң алаһидә пәлсәпәлик ой-пикирләргә бай, пәқәт өзигила хас услубта сизилған надир әсәрлирини көздин кәчүргәндиму, униң иҗадийитидә философиялик мәзмунниң чоңқур екәнлигини байқидуқ. Қисқиси, мәрһум әр-аял рәссамларниң көргәзмисигә қоюлған әсәрләрниң көпчилиги өзидә һаят гөзәллигини, бүйүк сезимларни бирләштүрүп турғандәк…

Шәмшидин АЮПОВ.

1305 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы