• Йеңилиқлар
• 14 Маусым, 2013

Уйғур таамлири — биринчи орунда

Миллий йемәк-ичмәкләр бир милләтни дунияға тонутушта әң муһим васитиләрдин болуп һесаплиниду. Шуңлашқа кейинки вақитларда Түркиядә уйғур таамлири хелила аммибаплиққа айланмақта. Түркия диярида хелә жиллардин бери уйғур таамлирини тонутуш йолида паалийәтчанлиқ көрситип келиватқан қериндашлиримизниң бири — шаирә Нурәла Көктүрк. Өткән һәптидә у шәһәрләрара тамақ мусабиқисиға қатнишип, униң қолидин тәйярланған таамлар йүз хил йемәклик арисида биринчи орунға сазавәр болди. Бу паалийәттин кейин Түркияниң 5-канили Нурәла ханимни һозуриға тәклип қилип, уйғур таамлири һәққидә көрситишни эфирға чиқарди. Ейтиш керәкки, Нурәла Көктүркниң җәмийәтлик һаят-нәпәси буниң билән чәкләнмәйду. У бу утуғидин кейин, Бурса шәһиридә өткүзүлгән «Түрк дунияси шеирлар топлими» намлиқ әсәрниң тонуштуруш мәрасимида шеир-декломацияләрни оқуп, көпчиликниң алқишиға муйәссәр болди. www.rfa.org «Учқунайдики» мәйипләр байрими Йеқинда «Хәйри-сахавәт» баш җәмийитиниң сахавәтчи атилар коллективи, «Билип» иллиқлиқ йәткүзүш групписидики бир қисим әзалар, һәр қайси таратқулар билән бирликтә Үрүмчидики «Учқунай» сағламлиқ яслисидә җәм болди. Мәзкүр яслиниң қурғучиси Учқунай өзиниң тиришчанлиғи һәм йолдишиниң қоллап-қувәтлиши нәтиҗисидә у йәрдә аңлаш ихтидаридин мәһрум болған гөдәкләрни тәрбийиләп келиватиду. Шу күни сахавәтчи атилар коллективиниң әзалири бу яслигә телевизор, тоңлатқу, киралғу қатарлиқ түрлүк мәишәт буюмлирини соға қилди. «Билип» иллиқлиқ йәткүзүш групписиму өз йенидин пул чиқирип бәргәндин сирт, өйдики укилири ойнайдиған оюнчуқларни балиларға тапшуруп бәрди. Тәсирлик мәнзирә, меһриван қолларниң алдида паалийәткә қатнашқан барчә кишиниң көзлиригә иссиқ яшлар келишти. www.mіsranіm.com «Наргизниң» утуғи Йеқинда Шималий Осетияниң пайтәхти Владикавказ шәһиридә «Кавказ уссули — достлуқ уссули» мавзусида балилар хореографиялик коллективлириниң ІІІ хәлиқара фестивали болуп өтти. Униңға МДҺ дөләтлиридин 19 кәспий уссулчилар коллективи қатнашти. Уларниң ичидә Қазақстандин кәлгән «Наргиз» вә «Горец» уссул ансамбльлириму бар. Гәп болуватқан фестивальда «Наргиз» уйғур ансамбли (бәдиий рәһбири Меһирниса Ибрагимова) үчинчи орунни елишқа муйәссәр болди. Бу сәпири давамида мәзкүр коллектив Бесланда һәм Тбилисида өткүзүлгән Гала-концерттиму өз һүнирини намайиш қилди. «Пәрваз» уйғур иҗрачилири җәмийити «Наргиз» ансамблиниң коллективини қолға кәлтүргән утуғи билән сәмимий тәбрикләп, униңға иҗадий муваппәқийәт тиләйду. www.parvaz.kz