• Спорт
• 14 Маусым, 2013

Утуқ тиләймиз

Йеқинда биз, бир топ алмутилиқ зиялилар, Чимкәнткә барғинимизда, мошу шәһәрдики тонушумиз Таймир Муһәмәтов бизгә бирнәччә яшни тонуштуруп, мәғрурланған һалда мундақ деди: — Бу биз махтинип жүргән чемпион қизимиз Әзизә Абдураимова болиду. Мениңда дәрру Әзизә билән йеқиндин тонушуш истиги пәйда болди. У 1989-жили Чимкәнттә  аддий уйғур аилисидә дунияға кәпту. Униң дадиси — Әхмәтҗан слесарь-монтажчи, аниси Мукарәм — бухгалтер. Аилидики үчинчи пәрзәнт болған Әзизә кичигидинла көпирәк оғул балилар билән арилашқанни яқтураттекән. Шуңлашқа униң билән бир синипта оқуватқан 3-4 бала таэквандо секциясигә йезилғанда, Әзизәму уларни әгишип, спортниң мәзкүр түри билән мәшиқлиниду. Вақитниң өтүши билән мәшиқләндүргүчи башқиларға қариғанда, уни көпирәк махташқа башлайду. Амма атиға қизиниң спортниң бу түригә шунчә берилип кетиши яқмайду. Шуңлашқа Әзизә амалсиз, спорттин қол үзүшкә мәҗбур болиду вә 2004-жили 9-синипни тамамлап, Чимкәнттики 5-кәспий-техникилиқ лицейда оқуйду. Бу йәрдә еғир атлетика бойичә секция моҗут еди. Әзизә өйдикилиригә гимнастика секциясигә берип жүримән дәп ейтип, өзи штанга көтириш билән шуғуллиниду. Күнләрниң биридә спорт залида пауэрлифтинг бойичә бирнәччә дүркүн дуния чемпиони Сергей Рашидов пәйда болиду. У кәспий спортчи сүпитидә өзигә шагирт издәп жүрәтти. Ахири спортчи икки жигит билән Әзизәниму «Олимпиада» спорт-сағламлаштуруш фитнес клубиға тәклип қилиду. Бу 2009-жилниң 24-декабрь күни еди. 2010-жили 17-мартта Қарағанда шәһиридә пауэрлифтинг бойичә Қазақстан Җумһурийитиниң чемпионати өтиду. Әзизә униңда биринчи орунни егиләп, Қазақстан чемпиони атилиду. 2010-жилдин башлап, Қазақстан миқиясида пауэрлифтинг, йәни штангини йетип көтириш бойичә Ә.Абдураимованиң алдиға һечким өтмиди. Әнди 2012-жили май ейида Удайпурда (Һиндстан) өткән Азия чемпионатида у иккинчи орунни егиләп, күмүч медаль билән мукапатанди. Шу жили сентябрьда Алмутида өткән Азия чемпионатида у йәнә биринчи орунға еришиду. Пауэрлифтинг —бойичә новәттики дуния чемпионати бийил июль ейида Москвада өтиду. Һазир Әзизә өзиниң мәшиқләндүргүчиси билән мәзкүр чемпионатқа җиддий тәйярлиниватиду. Әзизәгә утуқ тиләймиз. Рабик ИСМАЙИЛОВ. Чимкәнт шәһири.