• Спорт
• 21 Маусым, 2013

Сунмас ирадә

15 яшлиқ Мәликәм Тохтахунова мүмкинчилигиниң чәкләнгәнлигигә қаримай, спорт дуниясида тилға аларлиқ утуқларни қолға кәлтүрди. Өткән жили дохтурлар туғулушидин нака болған униңға суда чөмүлүшниң пайдилиқ екәнлигини ейтип, бассейнға бериш тәкливини бәргән еди. Мундақ имканийәт өз жутида болмиғачқа, аниси Рошәнгүл қизини өзлири туруватқан Қизил Ғәйрәт йезисидин анчә жирақ әмәс Панфилов йезисидики спорт комплексиға елип бариду. Шу чағда мәшиқләндүргүчиләрниң Мәликәмниң суда үзүшкә майиллиғи тоғрилиқ ейтқан бир еғиз иллиқ сөзи қизчаққа чоң мәдәт бериду. Шундақ қилип, тиришчан қиз бир жилниң ичидила өзиниң маһаритини намайиш қилип, вилайәт, җумһурийәт дәриҗисидики мусабиқиларға қатнишиду вә жуқури көрсәткүчләрни қолға кәлтүриду. Мәсилән, у кейинки икки айниң ичидила Талдиқорған шәһиридә өткән суда үзүш бойичә вилайәтлик турнирда 50 вә 100 метрлиқ мусапиләргә үзүштә әң яхши көрсәткүчләргә егә болуп, икки алтун медальни йеңивалди. Тараз шәһиридә өткән нака спортчиларниң ІV җумһурийәтлик спартакиадисида ялғуз алтун медаль 160 спортчиниң арисида униң әнчисигә тәгди. Һә, техи йеқиндила Қарағанда шәһиридә өткән җумһурийәтлик турнирда болса, әң яхши суда үзгүчиләр сепидин орун елип, брасс бойичә 100 метрлиқ мусапигә үзүштин — бронза, 50 метрлиқ мусапиға үзүштин күмүч медальниң саһиби аталди. — Қизимниң сунмас ирадиси түпәйли мошундақ утуқларни қолға кәлтүрүватқанлиғиға бәк қайилмән, — дәйду Мәликәмниң аписи, ІІ топтики нака Рошәнгүл Тохтахунова. — Униң келәчәктә техиму егиз пәллиләрдин көрүнидиғанлиғиға ишәнчим камил. Биз яш спортчини қолға кәлтүргән бу утуқлири билән сәмимий тәбрикләймиз. Пурсәттин пайдилинип, гезит арқилиқ һаллиқ шәхсләрни Мәликәмгә маддий җәһәттин яр-йөләк болушқа чақирғумиз келиду. Чүнки бүгүнки күндә нурғунлиған қабилийәтлик яшлиримизниң өсүп-йетилишигә шараит яритиш беваситә мәбләғ мәсилисигә мунасивәтлик екәнлиги һәммимизгә мәлум. Қасимҗан ЧОРУҚОВ. Талғир наһийәси.