• Җәмийәтлик тәшкилатларда
• 28 Маусым, 2013

Мәркәз һесавити тиңшалди

Йеқинда Уйғур наһийәлик һакимийәт өйиниң мәҗлисләр залида наһийәлик Уйғур этномәдәнийәт мәркизиниң һесават-сайлам жиғини болуп өтти. Униңда сөзгә чиққан мәркәз рәиси Закир Мәмиров бүгүнки күнгә қәдәр мәзкүр тәшкилат әмәлгә ашурған иш-чариләргә әтраплиқ тохтилип, бу әснада мәркәз паалийитиниң актив иштракчилириға өзиниң миннәтдарлиғини билдүрди. Андин мәркәз рәисиниң һесавити муһакимә қилинип, минбәргә көтирилгән Кичик Ақсу оттура мәктивиниң мудири Тохтахун Қадиров, наһийәниң чоң жигитбеши Артем Һәмраев, наһийәлик Ветеранлар вә ақсақаллар кеңишиниң рәиси Нурвәг Сейитов, Түгмән йезиси Ақсақаллар кеңишиниң рәиси Турсун Норузов мәркәз паалийитини қанаәтлинәрлик дәп баһалиди. Шундақла улар бәзи мәсилиләр бойичә өзлириниң ой-пикирлири биләнму ортақлашти. Мәсилән, ата-аниларниң пәрзәнтлирини ана тилимизда әмәс, өзгә тилларда оқутушқа болған майиллиғи. Уларниң пикричә, уйғур тилида билим алған балиниң келәчиги йоқмиш. Аләмни тар пәнҗиридин көрүп, нәслимиз томуриға палта чепиватқан чолта ой-пикирлик ата-аниларниң әтики күндә пәрзәндиниң қайси милләткә тәәллуқ болуп йетилидиғанлиғи һәққидә ойланмайватқанлиғи ечинишлиқтур. Йәнә бир муһим мәсилә, ана тилимизда йоруқ көрүватқан гезит-журналларға муштири топлаш иши наһайити тәсликтә һәл болмақта. Әдәбиятқа, сәнъәткә, ахири тарихимизға болған көз қаришимизму махтиғидәк әмәс. Бу әснада, болупму, яшлар билән яш өсмүрләрдә  қизиқиш байқалмайду. Наһийәдә той-төкүн вә өлүм узитиш ишлирини исрапсиз өткүзүш мәсилиси қолға елиниведи. Һәтта, наһийәлик гезит бәтлиридә мошу муюмларға сәрип қилинидиған һаҗәтликләр көләмиму елан қилинди. Лекин, сөз болуватқан мәркәз билән жигитбашлириниң мураҗиитини қоллиған һеч ким болмиди. Әһвал болса, бурунқи петичә қалди. Жиғин иштракчилири алдида сөзгә чиққан ҖУЭМниң рәиси Шаһимәрдан Нурумов мәзкүр тәшкилатниң асасий вәзипилиригә тохтилип, асасән, хәлиқләр бирлиги билән достлуғини мустәһкәмләш мәсилисигә көп көңүл бөлүш лазимлиғини тәкитлиди. Әнди жуқурида қәйт қилинған муәммаларни һәл қилиш үчүн елимизда һәммә шараитниң яритилғанлиғини әслитип өткән Шаһимәрдан Үсәйин оғли һәрқандақ мәсилә бойичә кәң җамаәтчиликтә тоғра көз қарашни вә иҗабий пикирни һасил қилиш мәдәнийәт мәркәзлири билән йезилар һакимлири, мәктәпләр мудирлири, жигитбашлири вә башқиму җәмийәтлик ишларниң активистлириниң әнчисидә екәнлигини атап көрсәтти. Ахирида у мошу йосунда паалийәтчанлиғи билән пәриқләнгән Чонҗа йезисидики 5-оттура мәктәпниң мудири Бәхтигүл Йолдашева билән мошу йезиниң жигитбеши Нурмәһәмәт Ариповқа ҖУЭМниң Пәхрий ярлиғини тапшурди вә Алмута шәһиридә болуп өткән Уйғур мәдәнийәт күнидә Уйғур наһийәси делегацияси вилайәт рәһбәрлигиниң жуқури баһасиға еришкәнлигини вә бу пүтүн хәлқимизниң утуғи екәнлигини пәхирлиниш илкидә атап өтти. Сөз новитини алған наһийә һакиминиң орунбасари Дәвлетҗан Деменбаев Қазақстан хәлқи Ассамблеяси паалийити даирисидә җай-җайларда хәлиқләр достлуғи билән бирлигини мустәһкәмләп, тарихий вә мәдәний мираслиримизни сақлап, бейитишта этномәдәнийәт мәркәзлириниң муһим роли барлиғини атап өтти. Җүмлидин наһийәлик Уйғур этномәдәнийәт мәркизиниң бу әснада атқурған ишлирини мунасип баһалиған натиқ кәлгүсидә диққәт мәркизидә болушқа тегиш бәзи мәсилиләр бойичә ой-пикри билән ортақлашти. Жиғин ахирида тәшкилий мәсилә қарилип, униң қатнашқучилири мәркәз рәислигигә йәкдиллиқ билән Закир Мәмировни қайтидин сайлиди. Өз новитидә Закир Мәмир оғли жутдашлириниң үмүтини ақлап, мәркәзниң һәм униң йенида қурулған кеңәш вә тәшкилатларниң паалийитини җанландурушқа бай һаятий тәҗрибисини сәрип қилидиғанлиғини қәйт қилди.     Махмут ИСРАПИЛОВ.