• Йеңилиқлар
  • 28 Маусым, 2013

Президент Павлодар вә Шәрқий Қазақстан вилайәтлиридә болди

Дүшәнбә күни Дөләт рәһбири Нурсултан Назарбаев Павлодар вилайитидә иш бабидики сәпәрдә болуп, бирқатар ишләпчиқириш орунлири вә мәһкимиләрниң иш-паалийити билән тонушти. Президент дәсләп вилайәт мәркизидики йеңи саламәтликни сақлаш объекти — 4-шәһәрлик шипаханини зиярәт қилди. Бу йәрдә Дөләт рәһбиригә «Саламатты Қазақстан» программисиниң әмәлгә ашурулуши тоғрилиқ һесават бәрди, медицина мәһкимисиниң паалийити билән тонуштурди. Шипаханида йеңи кардиохирургия мәркизи ишләватиду, у өткән жилниң ахирида Нурсултан Назарбаевниң қатнишиши билән ечилған. Бу йәрдә һазирниң өзидә 900дин ошуқ операция қилинди. Учришишқа қатнашқучилар Президентқа медицина саһасини қоллап-қувәтләватқанлиғи үчүн миннәтдарлиқ изһар қилди, у жүргүзүватқан иҗтимаий сәясәтни, җүмлидин пенсия системисини йеңилаш сәяситини қоллап-қувәтләйдиғанлиғини билдүрди. Президент җавап сөзидә кейинки жилларда дөләтниң саламәтликни сақлаш саһасини тәрәққий әткүзүшкә чоң диққәт бөлүватқанлиғини тилға алди. Андин кейин Дөләт рәһбири «Компания «Нефтехим LTD» җавапкәрлиги чәкләнгән йолдашлиғини зиярәт қилди. Мәзкүр кархана метилтретбутил эфирини, пропилен вә полипропилен ишләпчиқиришқа ихтисаслаштурулған. Чиқирилған мәһсулатниң асасий көләми чәткә әвәтиливатиду. Нурсултан Назарбаев кархана коллективи билән учрашқанда иш җәрияниға қизиқиш һасил қилипла қоймай, улар билән болған сөһбәттә пенсия ислаһити тоғрилиқму гәп қозғиди. Әмгәк коллективиниң вәкиллири Нурсултан Әбиш оғлиға аялларниң пенсия йешини ашурушни башлашни 2018-жилға қалдурғанлиғи үчүнла миннәтдарлиқ билдүрүпла қоймай, бәлки ишләпчиқириш орунлирида пенсиягә чиқиш алдида турған адәмләрни қоғдаш, мошу мәсилини қануний мукәммәлләштүрүш бойичә ениқ тәклипләрни бәрди. Өз новитидә Президент пенсия системисини йеңилашниң дөләтниң һазирқи тәрәққияти билән шәртләнгән зөрүр қәдәм екәнлигини чүшәндүрди. Андин кейин Дөләт рәһбири йеқинда Павлодарда ечилған Яшларға хизмәт қилиш мәркизини вә «Қазақтелеком» акционерлиқ җәмийитиниң Мәлуматларни ишләш мәркизи билән тонушти. Шу нәрсә диққәткә сазавәрки, Дөләт рәһбириниң бу қетим Павлодарға қилған иш бабидики сәпири Аяллар командилири арисида волейбол бойичә Қазақстан Җумһурийити Президентиниң кубоги үчүн ХХ хәлиқара турнирниң өткүзүлүшигә мас кәлди. Мәзкүр турнир 1994-жили дәсләпки қетим өткүзүлгәндә, Дөләт рәһбири оюнларниң бирини тамашә қилған еди. Президент бу қетимму «Астана» Муз сарийиға келип турнирға қатнашти. Нурсултан Назарбаевниң Павлодар вилайитидә болуш программиси шуниң билән аяқлишип, у иш бабидики сәпәр билән Шәрқий Қазақстан вилайитигә кәлди. Дөләт рәһбири Шәрқий Қазақстан вилайитигә келиши билән Өскәмән шәһиридики Ана вә бала мәркизини зиярәт қилди. Мәзкүр мәркәз нәтиҗидарлиқ перинатал технологияләр мәхсәтчанлиқ җарий қилиниватқан медицинилиқ комплекс болуп һесаплиниду. Президент дөләтниң елимиз саламәтликни сақлаш саһасини тәрәққий әткүзүшкә чоң диққәт бөлүватқанлиғини, шуниң нәтиҗисидә анилар вә балилар өлүминиң кәскин төвәнләп, һаят давамлиғиниң өсүватқанлиғини тәкитлиди. У шундақла һазир көрүлүватқан чариләрниң сағлам милләтни шәкилләндүрүшкә ярдәм қилидиғанлиғини тилға алди. Ана вә бала мәркизи — дөләт ғәмхорлуғиниң ярқин испати. Көпсаһалиқ медицина мәһкимиси перинатал мәркизидин, туғутханидин, балилар вә чоңлар шипаханилиридин ибарәт. Нурсултан Назарбаев елимиз медицинисиниң пәйдин-пәй хәлиқара дәриҗигә йетиватқанлиғини тилға алди. Униң сөзичә, медицина мәһкимилири заманивий җабдуқлар билән тәминлиниватиду, мәмликәттә мурәккәп операцияләр әмәлгә ашурулуватиду. Андин кейин Дөләт рәһбири Оқуғучилар сарийини зиярәт қилди. Президентқа оқуғучиларниң математика, ихтисат, экология, физика саһасидики илмий лайиһилири көрситилди. Нурсултан Назарбаев оқуғучиларға мустәһкәм  саламәтлик вә утуқ-муваппәқийәт тиләп, уларға автобус соға қилди. Өскәмәндә болғанда Президент шундақла «Kazakhstan Solar Sіlіcon» җавапкәрлиги чәкләнгән йолдашлиғи заводиниң ишләпчиқириш цехини көздин кәчүрди. Дөләт рәһбири кархана ишчилири билән сөһбәтләшти. ...Шәмәйдә Нурсултан Назарбаев биринчи болуп «Семей инжиниринг» заводини реконструкция қилиш лайиһиси билән тонушти. Полигонда бронетанк техникисиниң тәҗрибә үлгилири вә униң имканийити намайиш қилинди. Бронетанк қуралини вә техникисини кәшип қилиш, ишләпчиқириш һәм җөндәш, шундақла уларни йеңилаш мәзкүр карханиниң асасий паалийәт түри болуп һесаплиниду. Мәмликәт рәһбәрлигиниң қоллап-қувәтлиши түпәйли кейинки икки жилда бу йәрдә ишләпчиқириш көләми 17 һәссә өсүп, ишчиларниң сани 1000 адәмгә йәтти, кархана бойичә оттура иш һәққи 118 миң тәңгини тәшкил қилиду. Андин кейин Нурсултан Назарбаев 1-ТЭЦта болди. Президент бир чағда Шәмәйни иссиқлиқ билән тәминләшниң мәлум проблемиларни пәйда қилғанлиғини тәкитлиди. Бу мәсилини һәл қилиш Шәмәйни иҗтимаий-ихтисадий тәрәққий әткүзүш программисиниң асасий пунктлириниң бири болған. Шәһәргә бөлүнгән 37 миллиарда тәңгиниң 24 миллиарди мәзкүр карханини реконструкция қилишқа әвәтилди. Һазирқи вақитқа қәдәр бөлүнгән ахчидин 17 миллиард тәңгә өзләштүрүлди. Нурсултан Назарбаев кархана паалийити билән тонушти, ишчилар билән сөһбәтләшти. Президент шундақла шәһәр җамаәтчилигиниң вәкиллири билән учрашти. Улар Дөләт рәһбиригә Шәмәйниң һечқачан диққәтсиз қалмайватқанлиғи, көплигән проблемиларниң комплекслиқ һәл қилинип, медицина вә билим бериш мәһкимилирини селишқа, шәһәр йоллирини җөндәшкә қошумчә мәбләғ әвәтиватқанлиғи үчүн миннәтдарлиқ билдүрди. — Һазир йеңи ағриқхана, әқлий мәктәп селиниватиду. Дөләт шәһәрниң тәрәққиятиға лазимлиқ диққәт бөлүватиду, — дәп тәкитлиди Нурсултан Назарбаев. — Паравәнликниң әң асасий көрсәткүчи — бу аһалиниң сани. Шәмәйдә болса, аһали сани азаймайватиду, бәлки планлиқ өсүп, һазир 300 миңдин ошуқ адәмни тәшкил қилиду. Бу болса, турмушниң яхшилинип, адәмләрниң мошу йәрдә яшашни халаватқанлиғиниң испатидур. Президент Шәмәйгә қилған иш бабидики сәпириниң йәкүнини чиқирип, өзи бәргән тапшурмиларниң бу йәрдә орунлиниватқанлиғини, дөләт программилириниң адәмләр пайдисиға әмәлгә ашурулуватқанлиғини тәкитлиди. Умумән, икки вилайәткә қилған иш бабидики сәпири тоғрилиқ гәп қилип, Дөләт рәһбири Өскәмәндә болғандила муһим дөләт программилириниң әмәлгә ашурулуватқанлиғиниң қаралғанлиғини тәкитлиди. — Умумән, регионлар тәрәққий етиватиду, санаәт өсүшиниң 6,8 пайизни тәшкил қилидиғанлиғи байқалмақта. Униңда асасий үлүш еғир санаәт вә машина ясаш санаитигә тоғра келиватиду. Шундақла иҗтимаий саһаму яхши тәрәққий етиватиду, саламәтликни сақлаш вә иҗтимаий тәрәққият саһалиридики көрсәткүчләрму яхши. Мошуниң һәммиси мәмликәтниң иҗтимаий-ихтисадий тәрәққиятиниң умумий иҗабий йәкүнлиригә салмақлиқ һәссә қошуватиду, —  дәп тәкитлиди Нурсултан Назарбаев.

235 рет

көрсетілді

0

пікір
Алдыңғы мақала «Йешил бәлбағ» кәңийиду
Келесі мақала Доғап тәйярлаш усули

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

28 Қазан, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы