• Йеңилиқлар
• 11 Шілде, 2013

Пайтәхтниң 15 жиллиғиға беғишланған торт

6-июль күни Дөләт рәһбири Нурсултан Назарбаев Астананиң 15 жиллиғиға беғишланған мәйрәмлик тортни кесиш мәрасимиға қатнашти. «Хан шатыр» сода-оюн-тамашә мәркизидә болуп өткән тәнтәнилик мәрасимға пүткүл мәмликәттин кәлгән мәктәп олимпиадилири вә спорт мусабиқилириниң ғалиплири, балилар өйлиридә тәрбийиләнгүчиләр, оқуш әлачилири, қабилийәтлиқ һәм талантлиқ балилар қатнашти. Пайтәхтниң 15 жиллиқ юбилейи шәрипигә балилар мәйрәмлик концерт тәйярлиди, униңда җумһурийәтлик вә хәлиқара конкурсларниң лауреатлири, шундақла, Россия, Хитай, Өзбәкстан вә Қирғизстандин кәлгән өсмүрләрниң уссул коллективлири өз талантини намайиш қилди. Қазақстан Президенти мәрасимниң кичик қатнашқучилириға мураҗиәт қилип, Астана шәһириниң улар үчүн селинғанлиғини тәкитлиди. — Астана бари-йоқи 15 яшқа толди. Бу шәһәр силәрниң тәңтушуңлар, у силәр билән тәң өсүп, тәң гүллиниду. Силәр чоң болғанда, пайтәхтимиз қурулушини давамлаштурисиләр вә у техиму көркәм болиду. Шәһәргә йетәкчи алий оқуш орунлири, дәм елиш җайлири орунлашқан, униң әтрапида «йешил бәлбағ» вуҗутқа кәлтүрүлди. Мошуниң һәммиси силәрниң бәхитлик келәчигиңлар үчүн әмәлгә ашурулди, — дәп билдүрди Нурсултан Назарбаев. Ахирида Дөләт рәһбири жиғилғанларниң һәммисигә утуқ-муваппәқийәт, бәхит-саадәт вә молчилиқ-паравәнлик тилиди. Йоғанлиғи 4х4 метр болған квадрат шәклидики юбилейлиқ тортниң салмиғи 600 килограммдин ошуқ. Униңға Астананиң әң муһим объектлири вә асасий диққәткә сазавәр җайлири шәклидики безәкләр орунлаштурулған, оттурида болса, «Байтерек» монументиниң егизлиги 1,2 метр болған шәкли қәд көтирип туриду.