- Дидар ғенимәт
- 19 Шілде, 2013
Ана мәктивидә баш қошти
Пәнҗим йезисидики А.Розибақиев намидики мәктәп наһийәдики дәсләпки билим дәргаһлиридин болуп һесаплиниду. Дәсләп башланғуч, андин сәккиз жиллиқ вә ахири оттура мәктәп болуп, хәлқимизниң мунәввәр пәрзәндиниң нами билән атилип келиватқан бу оқуш орни, аз- кам, тохсән жиллиқ тарихқа егә. Өткән вақит мабайнида мәзкүр билим дәргаһидин миңлиған шагиртлар учум болуп, җәмийәттин өзлириниң мунасип орнини тапти. Уларни бир-бирләп санап чиқиш мүмкин әмәс, әлвәттә. Бирақ сабиқ шагиртлар аридин қанчилик вақит өткәнлигидин қәтъий нәзәр, өзлири учум болған алтун угиси билән меһриван устазлирини һәрқачан яд етип кәлмәктә. Һәр жили мәктәпни тамамлиғучиларниң 50, 40, 30 вә 20 жилдин кейинки өткүзүлүватқан учришишлири әйнә шуниң испати.
Йеқинда 1973-жили қоллириға камаләтлик шаһадәтнамә елип, мустәқил һаятқа қәдәм басқан учумкарларниң ана мәктивидики учришиши болуп өтти. Улар 28 нәпәр оғул-қиз еди. Өмүрниң соқмақлирида чачлириға ақ, үзлиригә қоруқ чүшүп, бова-момилардин болуп қапту. Бәзилириниң бир-бирини бирдин тонумай қалғанлиғиниң сәвәвиму әйнә шуниңда. Немила болмисун, улар қучақ йейип, қериндашларчә дидарлашти. Мәктәптики А.Розибақиевниң бюстиға гүлчәмбәрләрни қоюп, өзлири оқуған синип бөлмилирини арилиди. Дуниядин өткән устазлири билән синипдашлирини әскә елип, роһиға тазим қилди. Синипдашлири демәкчи, Пәридәм Тохтахунова, Һепизәм Зайитова, Айимқиз Зулияровани қарам әҗәл бевақит аридин елип кәтти. Мәрһумларни чоңқур ечиниш билән хатириләп, қәбирлиригә гүлләрни қойди.
Учришиш Өсәктики «Ирадә» кафесида давамлашти. Шох нахша-сазлар тәсири астида қириқ жиллиқ сеғиниш, кинәш сезимлири билән суғирилған жүрәк қетидики сөзләр ейтилип, сәмимий тиләк-истәкләр изһар қилинди. Яркәнт тәвәсидин ташқири, Алмута, Ташкәнт вә башқа жирақ-йеқин йәрләрдә истиқамәт қиливатқанлиғиға қаримастин, мошундақ көңүл йеқинлиғиниң һечқачан жирақлап кәтмәслиги тоғрисида хаһиш билдүрүлди. Умумән, баяшайәт расланған ақ дәстихан әтрапида ейтилмиған яхши сөз қалмиди. Сабиқ синипдашларниң шатлиғи шунчилик болдики, һәммиси четидин нахшичи һәм уссулчиға айлинип кәтти.
Учришиш қатнашқучилири ахирида мошундақ әстин чиқмас дидарлишишниң тәшәббускарлири болған Қурванҗан Әмәтовқа, Иминҗан Яқуповқа, Абдурахман Үсүвахуновқа һәм маддий җәһәттин ярдәм көрситип, һамийлиқ қилған ака-ука тиҗарәтчиләр Қурванҗан билән Мәсимҗан Темировларға чәксиз миннәтдарлиғини билдүрүп, хошлашти.
Нурәхмәт ӘХМӘТОВ.
Панфилов наһийәси.408 рет
көрсетілді0
пікір