• Турнир
  • 19 Шілде, 2013

Яш палванлар күч синашти

Яш әвлатни билим билән қанатландуруп, уларниң һаяттин өз орнини тепишиға шараит яратқан устазларниң әҗри унтулмайду. Йерим әсирлик һаятиниң тәңдин-толисини маарип саһасиға беғишлиған Турсун Қәмәков әйнә шундақ жутдашлири билән шагиртлириниң қәлб төридин мәңгүлүк орун алған устазлардин. 1933-жили Уйғур наһийәсиниң Довун йезисида дунияға келип, дәсләп шу йәрдики мәктәптә, андин Яркәнт шәһиридики педагогикилиқ училищеда тәһсил көргән у шуниңдин кейинки һаятини Довун вә Ардолата йезилиридики мәктәпләрдә өткүзди. Арилиқта әмгәктин қол үзмәй, КазПИниң филология факультетини уйғур тили вә әдәбияти пәнлириниң муәллими мутәхәссислиги бойичә оқуп, түгәтти. Т.Қәмәков йетүк мутәхәссис вә тәләпчан устаз сүпитидила әмәс, пәрзәнтлиригә аңлиқ тәрбийә бәргән ғәмхорчи ата ретидиму көпчиликниң иззәт-еһтирамиға бөләнгән инсан еди. Бу җәһәттин сөз қилғанда мәрһумниң пәрзәнди — хәлиқара дәриҗидики спорт маһири, кикбоксинг бойичә дуния чемпиони Долқун Қәмәковниң, нәврилири — кикбоксинг бойичә дуния чемпиони, хәлиқара дәриҗидики спорт маһири Шах-Аббасниң, кикбоксинг бойичә дуния чемпионати күмүч медалиниң саһиби, хәлиқара дәриҗидики спорт маһири Шахмуратниң исимлирини алаһидә мәмнунийәт билән тилға елишқа әрзийду. Йеқинда Ардолата йезисидики оттура мәктәптә әйнә шу жутдашлири исмини яд етип келиватқан пешқәдәм устазниң хатирисигә беғишланған қазақчә күрәш бойичә вилайәтлик турнир болуп өтти.  Мошу йәрдә мәзкүр турнирниң уюштурулушиға көп күч  чиқарған Рәһимҗан Бишәров тоғрилиқму ейтип өткән орунлуқ. Униңму спорт саһасида қолға кәлтүргән утуқлири көпләп санилиду. Өз вақтида әркин күрәш бойичә Өзбәкстанниң чемпиони аталған у кейинки жилларда қазақчә күрәш бойичә ветеранлар арисида уюштурулуватқан һәрхил дәриҗидики мусабиқиларға иштрак қилип, мукапатлиқ орунларни егиләп кәлмәктә. 2011-жили Қапчиғай шәһиридә өткән вилайәтлик турнирда униң «түйе балуан» аталғанлиғи сөзүмизгә испат болалиса керәк. Мол тәҗрибигә егә спортчи шуниң билән бирқатарда яш әвлат тәрбийисигиму  алаһидә көңүл  бөлүватиду. Хелә жиллардин бу ян Ардолата йезисидики оттура мәктәптә тәнтәрбийә пәнидин дәрис берип келиватқан у кейинки вақитларда  мәлидә наһийәлик яш өсмүрләр спорт мәктивиниң шөбисини ечип, сәра балилириниң спорт билән шуғуллинишиға шараит яратти. Шагиртлириниң һәрхил дәриҗидики мусабиқиларда мукапатлиқ орунларни егиләп келиватқанлиғиму әйнә мәшиқләндүргүчи Р.Бишәровниң тинимсиз әмгигиниң нәтиҗиси екәнлиги муқәррәр. Устази Т.Қәмәковниң хатирисигә беғишлап турнир өткүзүш тоғрилиқ дәсләп тәшәббус көтәргәнму шу яқ. Униң бу пикрини мәрһумниң пәрзәнтлириму йәкдиллиқ билән қоллап-қувәтлиди. Турнирниң тәнтәнилик қисмини Ардолата оттура мәктивиниң мудири Дамир Әмәров киришмә сөз билән ачқандин кейин, Уйғур наһийәлик спорт бөлүминиң башлиғи Адилҗан Қурбанниязов, наһийәлик яш  өсмүрләр спорт мәктивиниң мудири Җаһангир Мәҗитов, җумһурийәтлик Уйғур этномәдәнийәт мәркизи рәисиниң орунбасари Нурмәһәммәт Палтахунов, җумһурийәтлик «Уйғур авази» гезитиниң баш муһәррири Мухтәрҗан Җумаров, наһийәлик яш өсмүрләр спорт мәктиви мудириниң орунбасари Низамдун Исламов вә Дардамту оттура мәктивиниң мудири Ваһитҗан Һосманов сөз елип, шу күнки турнирниң  маһийитигә тохталған һалда мәрһум һәққидики хатирилири билән бөлүшти. Андин Долқун Қәмәков атисиниң хатирисигә беғишланған  турнирни өткүзүшкә көп күч чиқарған мәктәп мәмурийити билән жут оғланлириға уруқ-туққанлири намидин миннәтдарлиқ изһар қилди. Шуниңдин кейин мәктәп бәдиий һәвәскарлири тәрипидин тәйярланған ихчам концерт тамашә қилинип, җай-җайлардин кәлгән палванлар күч синашти. Бир күнгә созулған яш палванларниң мусабиқиси интайин қизиқ һәм кәскин шараитта өтти. Алимҗан Сулайманов башлиған қазилар топиниң адил баһалиши нәтиҗисидә Самит Зикрахунов (Ардолата), Асатин Мухтаров (Чарин), Ельдар Тайиров (Чарин), Батур Розахунов (Чонҗа), Ислам Нәсирдинов (Чонҗа), Нәзәр Махмутов  (Чонҗа), Арыстан Абулҗанов (Чарин), Асылбек Тазиматов (Чарин),   Данияр Яқупов (Ават), Әлишер Мәсимов (Чарин), Мәһәммәд Нәсибуллаев (Чонҗа) һәрхил салмақ категориялири бойичә чемпион атилип, медаль вә дипломлар билән мукапатланди. Умумкомандилиқ һесап бойичә биринчи орунни Ардолата, иккинчи орунни Чонҗа, үчинчи орунни Чарин йезисиниң палванлири  егиләп, кубок вә дипломлар билән тәғдирләнди. Шу күни жут қойнида Турсун Қәмәковниң пәрзәнтлири тәрипидин мәрһум роһиға атап нәзир берилди. (Өз мухбиримиз).

200 рет

көрсетілді

0

пікір
Алдыңғы мақала Футбол мәйданида — гөдәкләр
Келесі мақала Шагиртлар күч синашти

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы