• Йеңилиқлар
• 15 Тамыз, 2013

«Шахтер» билән «Ақтөбиниң» утуғи

Футбол 7-август күни Албанияниң пайтәхти — Тирана шәһириниң «Кемаль Стафа» стадионида Қазақстан футболиниң юлтузи янди десәк, һеч мубалиғә болмас. Раст, бу күни Қарағандиниң «Шахтер» командиси Албанияниң «Скендербеу» клубидин 2:3 һесави («Шахтер» тәркивидә поңзәкләрни Сергей Хижниченко билән Мақсат Байжанов киргүзди) билән йеңилип қалсиму, икки учришишниң йәкүни бойичә Чемпионлар лигисиниң плей-офф басқучиға йолланма алди. Мәлумки, 30-августта Қарағандида өткән  матчта хаңчилар рәқиплири үстидин 3:0 һесави билән ғалип чиққан еди. Әнди улар Чемпионлар лигисиниң плей-офф басқучидин өтәлмисиму, сөзсиз, Европа лигисиниң топлуқ турнириға қатнишиду. Әнди Ақтөбә футболчилири болса, Европа лигисида Исландияниң «Брейдаблик» командиси билән учришип, өз мәйданида 1:0 һесави билән ғалип чиққан еди. Бирақ Тиранада өткән җавап оюнда шундақ һесап билән йеңилип қалди. Шуңлашқа басқуч ғалибини ениқлаш үчүн қошумчә икки тайм бәлгүләнди. Әнди вә командилар қошумчә вақиттиму һесапни өзгәртәлмигәнликтин, матч ғалиби пенальти арқилиқ ениқланди. Мана мошу «лотереядә» «Ақтөбә» вә Қазақстан талланма командисиниң дәрвазичиси Андрей Сидельников һәқиқий маһаритини көрситип, төрт поңзәкни қайтурди вә командисини Европа лигисиниң новәттики басқучиға елип чиқти. Ақтөбиликләр пенальтидин икки поңзәк (Эмиль Кенжесариев, Тимур Кападзе) киргүзиду. Әлвәттә, футбол ишқивазлири қарағандилиқлар билән ақтөбиликләрниң новәттики басқучқа йолланма алғанлиғидин вә буниңда «Шахтерниң» Шотландияниң «Селтик» командиси, «Ақтөбә» футболчилири болса, Украининиң «Динамо» клуби билән учришидиғанлиғидин хәвәрдар. Шуңлашқа бу материал һәр икки матч тоғрилиқ тәпсилий һесават әмәс. Асасий гәп, Қазақстан футболиниң пәйдин-пәй риваҗлинип, аста-аста болсиму Европа командилири билән «үзәңгә соқуштуралиғидәк» дәриҗигә йетишкә интиливатқинида. Мәлумки, биз әсирниң бешида Азия Футбол Конфедерациясидин УЕФАға өткәндә, қитъәниң вә сәйяриниң әң йетәкчи футбол клублириниң дәриҗисигә йетишни мәхсәт қилған едуқ. Бирақ һәрқандақ нәтиҗә бирдинла қолға кәлмигинидәк, һәм клублар, һәм миллий команда дәриҗисидә Европа қитъәсидә басқан қәдимимиз бийилғичә оңушлуқ болмай кәлгән еди. Шуңлашқа айрим футбол мутәхәссислири (уларниң арисида футбол мавзусини йорутуватқан журналистларму йоқ әмәс — Ш.М.) УЕФА тәркивигә өткәнлигимизни қәтъий тәнқит астиға елип, пессимистик пикир жүргүзүшкә башлиған еди. Лекин «Көч жүрә-жүрә түзиләр» демәкчи, Қазақстан футболчилириму һәм талланма команда, һәм клублар дәриҗисидә айрим учришишларда хелә яхши оюн көрситишкә башлиди. Мана, әнди Қазақстан футболиниң йүз жиллиғида йетәкчи футбол командилиримиздин болған «Шахтер» Европа кубоклири турнирлириниң бириниң — йә Чемпионлар лигисиниң, йә Европа лигисиниң — топлуқ басқучида оюн көрситидиған болди. Йошурушниң һаҗити йоқки, биз мундақ нәтиҗини он жилдин ошуқ күттуқ. Бу пәқәт «Шахтерниң» яки «Ақтөбиниңла» әмәс, бәлки пүткүл Қазақстан футболиниң утуғи. Бу бир тәрәптин җумһурийәтниң җошқун тәрәққий етиватқанлиғиниң көрсәткүчи болса, иккинчи тәрәптин елимиз футбол системисиниң өрләш басқучиға қарап бәт алғанлиғиниң испати. Әндики гәп мошу йолдин янмай, барлиқ имканийәтләрдин пайдилинип, алға илгириләш керәк. Башқичә болушиму мүмкин әмәс. Чүнки миллионлиған футбол ишқивазлири қазақстанлиқ клубларниңму Европида һөрмәткә егә болушини истәйду.

                                       Шөһрәт МӘСИМОВ.