• Кәсипдаш һәққидә сөз
  • 23 Тамыз, 2013

Қисқа, амма мәзмунлуқ һаят кәчүрди

Мана кәсипдишим Рәхимҗан Әхмәтҗан оғли Әршидиновтин мәңгүгә айрилғинимизға қириқ күн толди. У әҗайип талантлиқ, салаһийәтлик, шипа қоллуқ врачлардин болидиған. Бемарларға сәмимий һәм иллиқ мунасивәт қилидиған, қолидин келидиған ярдимини айимайдиған қәлби сехи инсанлардин еди. Аилисигә ғәмхорчи, достқа садиқ болуп өткән жигит. Униң билән достлишишниң, хизмәтдаш болушниң өзи бир раһәт еди. Һәрқандақ ишни униңға ишәшлик тапилашқа болатти. Рәхимҗан 1999-жили Алмута дөләт медицина университетини тамамлиған. Униң билән мән 2004-жили, йәни у Алмутидики 4-шәһәрлик клиникилиқ ағриқханиға ишқа кәлгәндә тонушқан едим. У әмгәк паалийитини әң еғир бөлүмдин — пәвқуладдә хирургия бөлүмидин башлиған. Бу хизмәт яш мутәхәссистин чаққанлиқни, җиддий тәйярлиқни вә жуқури кәспий маһарәтни тәләп қилатти. Яш мутәхәссис өзиниң билим-қабилийити вә кәспигә болған чәксиз муһәббити түпәйли зиммисигә жүкләнгән вәзипиниң һөддисидин муваппәқийәтлик чиқип, сөйүмлүк хизмитини тез өзләштүрүвалди. Рәхимҗан Әхмәтҗан оғли зиялий һәм мәдәнийәтлик дохтурлардин болғачқа, униң билән тез арида тил тепишип, һәтта достлишип кәттуқ. Иккимизниң бир-биримизгә болған садақитимизгә һечқандақ шәк-шүбһә йоқ еди. Өзәм ишләйдиған ағриқханиға ишқа тәклип қилғандиму у мениң көңлүмни қалдурғини йоқ. Бу йәрдә у маңа адәттики кәсипдашла әмәс, һәқиқий мәнасидики салаһийәтлик мутәхәссис болуп шәкилләнди. У иш бабида һәрқандақ еғир дәқиқиләрни, уйқисиз түнләрни, беарам күнләрни баштин кәчүрсиму, бирәр қетим шикайәт-налисини аңлиған әмәсмиз. Бизниң миннәтсиз меһнитимиздә мундақ хисләтләр бәкму керәк. Умумән, Рәхимҗан Әхмәтҗан оғли қисқа, мәзмунлуқ һаятини адәм саламәтлигини сақлаштәк мурәккәп, амма шәрәплик вәзипигә беғишлиди. Бойидики җавапкәрлик һәм кәспигә болған садақәт түпәйли у бемарларға жуқури дәриҗидә хизмәт көрситишни билди. Униңға хиҗалити чүшкәнләрниң һәммиси чәксиз миннәтдарлиғини билдүрүп, иллиқ тиләклирини яғдуруп кетишәтти. Һәрқандақ операцияниң нәқәдәр ховуплуқлиғи, бу җәриянда хирургниң қанчилик тәвәкәлчиликкә баридиғанлиғи талашсиз. Мундақ пәйттә Рәхимҗан өзини хатирҗәм һәм ишәшлик тутушни, бемарда үмүт пәйда қилишни биләтти. У әмгәк паалийитиниң көп қисмини сәрип қилған травматология саһасидиму көплигән муваппәқийәтләргә қол йәткүзди. Иккимизгә бу саһада әмәлиятта илгири-кейин пайдилинилмиған нурғунлиған йеңи усулларни җарий қилишқа тоғра кәлди. Артроскопия билән эндопротезлаш шулар җүмлисидиндур. Рәхимҗан иккимиз тиз өгилири бағлиғучилирини протезлаш бойичә операцияни утуқлуқ аяқлаштурғанда, хошаллиғимиздин бешимиз көккә йәткән пәйтләр һелиму ядимда. Әйнә шуниңдин кейин онлиған мундақ мурәккәп вә әҗайип операцияләрни әмәлгә ашурдуқ. Рәхимҗан Әхмәтҗан оғли күндилик хизмити биләнла чәкләнмәтти. У иштин бош вақитлирида медицина саһасиға мунасивәтлик әдәбиятларни көп оқатти, Интернеттин йеңилиқларни издәтти. Буниңдин ташқири травмотология бойичә барлиқ йеңи технологияләр һәм усуллар бойичә мәхсус курслардин өткән. Мән Рәхимҗанниң аиләвий һаятидинму хәвәрдар. Атиси Әхмәтҗан — тәҗрибилик врач. Аниси Хуршидәм —пешқәдәм педагог. Өмүрлүк җүпти Гүлмира иккиси бир оғул вә икки қиз көрүп, уларниң күндин-күнгә чиқиватқан қилиқлириға, татлиқ гәплиригә зоқлинип, бәхитлик һаят кәчүрүвататти. Әң кичик қизи техи бир яшқиму толмиған. Рәхимҗан уни бағриға бесип үлгәрди. Амма… Мениң билидиғиним, дохтурлар һечқачан өзини күтмәйду һәм айимайду. Өзидин көрә көпирәк өзгиләрниң ғемини йәйду. Рәхимҗанму худди шундақ өзигә йепишқан ағриқ билән күришиштә ерәңсизлик қилдимекин… Йеңилидиғинини сәздиму яки күрәшкүси кәлмидиму, әйтәвир,  қиран йешида  кесәлниң алдида тиз пүкүшкә мәҗбур болди... Мән мошу мақаләмниң ахирида Рәхимҗанниң аилисигә, ата-анисиға сәвирлиқ тиләймән. Кәсипдишим қисқа һаят кәчүрсиму, өзиниң кәйнидин өчмәс из қалдуруп кәтти. Шуңлашқа униң исми қәлбимиз төридә мәңгү сақлиниду.

   Владимир СЕМЁНОВ,

Алмута шәһәрлик тез ярдәм көрситиш ағриқханиси травматология бөлүминиң башлиғи.

367 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы