• 1-сентябрь — Билим күни
  • 30 Тамыз, 2013

Устазниң утуқлири

Кәлгүси әвлатқа аңлиқ тәрбийә вә сүпәтлик билим беришкә бар иждиһати билән берилип ишләватқан һәқиқий устазлар көпләп санилиду һәм улар әйни әһвалниң тамамән әксичә екәнлигини испатлимақта. Уйғур наһийәсидики Түгмән оттура мәктивиниң уйғур тили вә әдәбияти пәнлириниң муәллими Хәринсахан Иминова әйнә шулар жүмлисидиндур. Адәттә, оқуғучиниң ана тилға болған көзқаришини шәкилләндүрүштә тил вә әдәбият пәнлири асасий роль ойнайду. Буни устазларму яхши чүшиниду, әлвәттә. Йеза балилириниң дилиға мәрипәттин чирақ яққан  муәллим Хәринсаханму өз шагиртлириниң ана тилини қәдирләп, хәлиқсөйәр әзимәтләрдин болуп йетилишигә көңүл қойған устаздур. Униң тәрҗимиһалиму кәсипдашлириниңкидин һеч пәриқләнмәйду. 1987-жили Түгмән оттура мәктивини тамамлап, КазПИниң филология факультетида тәһсил көриду. 1992-жили наһийәдики Узунтам оттура мәктивидә устазлиқ паалийитини башлиған у 2005-жили ана жутидики мәктәпкә авушуп, шундин етиварән, қәлб хаһиши билән таллавалған кәспи бойичә әмгәк қилмақта. Тәжрибилик кәсипдашлиридин қийин һәм шәрәплик болған бу кәсипниң қир-сирини үгинип, өзигиму, шагиртлириғиму тәләпчанлиқ тонутқан муәллим бүгүнки күндә тәжрибилик устазлар сепидин орун алди. Илғар иш-тәҗрибиси Алмута вилайәтлик муәллимләрниң билимини мукәмәлләштүрүш институти нәшир қилған «Тәуелсіздіктің тура жолы — білімде» вә «Бәхитниң бәлгүси — илим вә билимдур» топламлирида йоруқ көргән. Өзи болса, көплигән байқашларға иштрак қилип, мукапатларға еришти. Мәсилән, 2007-жили жуқуридики институт уюштурған «Тіл бірлігі — ел бірлігі» намлиқ җумһурийәтлик семинарда у вилайәтлик маарип бөлүминиң Пәхрий ярлиғи билән мукапатланған. Кейинки жили наһийәлик «Жил синип йетәкчиси» байқишида — иккинчи, «Жил муәллими — 2010» наһийәлик байқишида үчинчи орунларға егә болди. Үстимиздики жили униңға Билим вә пән министрлигиниң Миннәтдарлиқ хети тапшурулди. Наһийә рәһбәрлигиниң тәшәббуси билән шаир Илия Бәхтияниң туғулғиниға 80 жил толуши мунасивити билән нәшир қилинған «Поэзия сәрдари» китавиниң һәммуәллипи Хәринсахан Иминова болди, өткән жили тил вә әдәбият пәнлириниң вилайәтлик байқишида «Зерделі муғалим» номинацияси бойичә ғалип аталди. Устаз үчүн бийилқи жилму алаһидә болди. У Астана шәһиридә өткүзүлгән Қазақстан Җумһурийити филологлириниң қурултийиға қатнашти. Ейтишичә, миллитимиз вәкиллиридин филология пәнлириниң доктори Алимҗан Тиливалди иккиси иштрак қилған мәзкүр қурултайда филологиялик билим беришни тәрәққий әткүзүш үчүн елимизда тил вә әдәбият пәнлирини сүпәтлик оқутушниң йоллирини ениқлаш вә бу әснада муһим әһмийәтлик муәммаларни һәл қилип, қазақстанлиқ билим беришни мукәммәлләштүрүш үчүн вәтәнлик вә чәтәллик тәҗрибиләрни кәң қоллиниш, инновациялик билим бериш технологиясини пайдилиниш вә йетәкчи филолог-устазлар билән новатор муәллимләрниң иш-тәжрибилирини тәрғип қилиш һәм көптиллиқ билим бериш чәмбиридә муәллимләрниң йеңи әвладини тәрбийиләш мәсилилири муһакимә қилинипту. Демәк, талашсизки, устазларға йәниму зор жавапкәрлик жүклинип, кәлгүсидә улардин техиму нәтиҗидарлиқ әмгәк тәләп қилиниду. Бу тоғрилиқ мошу йеқинда наһийәдә болуп өткән муәллимләрниң август кеңәшмисидиму әтраплиқ сөз болди. Ейтмақчи, кеңәшмә давамида,  җәмийәтлик ишлардики паалийәтчанлиғи үчүн  Хәринсахан Обулқасим қизиға Талдиқорған территориялик кәспий иттипақ кеңишиниң Миннәтдарлиқ хети тапшурулди. Бизму, өз новитидә, униңға охшаш миңлиған һәқиқий устазларға йеңи оқуш жилида утуқ тиләймиз.

Махмут ИСРАПИЛОВ.

190 рет

көрсетілді

0

пікір
Алдыңғы мақала Миллий маарип — моҗутлуғимиз мәнбәси
Келесі мақала БАРНИ ЙОҚ ҚИЛИШ ОҢАЙ

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

ПІКІР ҚАЛДЫРУ

Сіздің электронды пошта жарияланбайды. Қатарды міндетті түрде толтырыңыз *

Уйғур авази

23 Қыркүйек, 2020

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы