• 1-сентябрь — Билим күни
• 30 Тамыз, 2013

БАРНИ ЙОҚ ҚИЛИШ ОҢАЙ

Талғир наһийәсиниң Гүлдала йезисидики 21-оттура мәктиви өткән жилниң йәкүни бойичә наһийәдики әң үлгилик билим дәргаһлириниң бири аталди. Биртуташ миллий тесттин гүлдалалиқ  түләкләр оттура һесап билән  71 балл елип, әйнә шундақ утуққа еришти. Бийил мәктәпни тамамлиған алтә бала алимй оқуш орниға грантқа чүшкән болса, униң иккиси уйғур. Мошу мәктәптин һәр жили учум болуватқан балиларниң 70 — 80 пайизи өзимизниң қара көзлири шуни көздә тутқан Гүлдала йезисиниң уйғур жамаәтчилиги 1989-жили мәзкүр мәктәптә уйғур синипини ачқан еди. Һазир у синипларда 500гә йеқин бала билим алмақта. Бийил 1-синипқа 26 гөдәк қәдәм тәшрип қиливатиду. Шундақла бу жили мәктәпкә тәйярлиқ синипи ечилип, униңға 28 оғул-қиз келиш алдида туриду. — Уйғур синиплирини сақлап қелишта Гүлдала йезисиниң жигитбеши Злавдун Авдинов башлиқ уйғур жамаәтчилиги көп күч чиқириватиду, — дәйду мәктәп мудири Қуан Айтбаев. — Мәнму уларға қолумдин келишичә ярдәм қиливатимән. Җүмлидин мәктивимиздә билим сүпитини техиму яхшилаш, оқуғучиларни дәрисликләр билән тәминләш охшаш мәсилиләрдә бирлишип иш тутимиз. Биздә «муәллим начар» яки «китап йоқ» дегән проблема йоқ. Мәктивимиздики 150 устазниң йерими уйғур миллитиниң вәкиллири. Уйғур синипиға уйғур устази дәрис өтүши керәк. Һазир шәһәрдә бәзи уйғур мәктәплириниң мудирлири билән уйғурларға вакаләтән бәзи тәшкилатларниң балиларни көп тилда оқутуш мәсилиси әтрапида «ат чепип» жүргәнлигидин хәвирим бар. Амма шәхсән мән униңға қарши. Өткән жили бизниң мәктәптин төрт бала медицинилиқ университетқа чүшти. Униң иккиси уйғур балиси. Әгәр уйғур мәктивидә яки синиплирида билим начар болса, балилиримиз мошундақ утуқларға қол йәткүзәттиму? Әлвәттә, яқ. Шуңлашқа қолда бар алтунни қәдирләшни билиш керәк. Барни йоқ қилиш оңай, амма йоқни бар қилиш наһайити тәс.

Бәхтишат СОПИЕВ.

Талғир наһийәси.