• Хәйрихаһлиқ
• 11 Қазан, 2013

Мәктәпләргә маддий ярдәм

Өткән һәптиниң йәкшәнбә күни җумһурийитимиздә Муәллимләр күни атап өтүлди. Шуниңға мунасивәтлик җумһурийәтлик Уйғур этномәдәнийәт мәркизи йенидики Клара Шардинованиң рәһбәрлигидики  Ишбиләрмән аяллар клубиниң әзалири Алмута шәһиридики уйғур балилири билим еливатқан үч таза вә бир арилаш билим дәргаһидики устазларни кәспий мәйрими билән тәбриклиди. Ишбиләрмән аяллар өзлириниң дәсләпки қәдимини шәһәрдики М.Яқупов намидики 101- мәктәп-гимназиядин башлиди. У йәрдә уларни мәзкүр билим дәргаһиниң мудири Хуршидәм Ниязова рәһбәрлигидики устазлар коллективи қарши алди. Клуб рәиси Клара Турсун қизи алди билән устазларға ишбиләрмән аялларни тонуштурди. Улар — һәдә-сиңил Нурванәм, Турсунай, Турахан Низамидиновалар, Ирадәм Тохтасунова, Римма Злавдинова, Халидәм Һекимбәг, Адаләт Насирова вә Гүлҗаһан Искәндәрова. — Биз, алдимиз — төрт, кәйнимиз иккидин бала тәрбийилигән анилардин, — деди Клара Турсун қизи. — Һазир нәвриләрни өстүрүватимиз. Һәрқандақ аилидики балиниң өсүп-йетилишидә устазларниң алаһидә роль ойнайдиғанлиғини яхши билимиз. Мәктәп — пәрзәнтлиримизниң иккинчи өйи, устазлар болса, уларниң иккинчи атиси һәм аниси. Йәнә келип, балиларниң «җапасини» көпирәк силәр тартисиләр. Әнди беваситә уйғур мәктәплиригә келидиған болсақ, раст, биз заман тәливигә бағлиқ балилиримизни өз ана тилида оқуталмидуқ. Амма һәммимизниң жүриги «уйғур» дәп соқиду. Бүгүн силәрниң алдиңларға келип, хошаллиғиңларға ортақлишишқиму әйнә шу нәрсә түрткә болди. Өз новитидә, силәрни кәспий мәйримиңлар билән чин жүригимиздин сәмимий тәбрикләп, ишиңларға утуқ тиләймиз. Шуниңдин кейин клуб әзалири новәтлишип устазларни кәспий мәйрими билән тәбрикләп, мәшәқәтлик кәсип егилиригә өзлириниң миннәтдарлиғини изһар қилди. Һазир қуруқ сөз билән бирәвниң көңлини елиш қийин. Әйнә шуни әскә алған ишбиләрмән аяллар шәһәрдики уйғур балилири билим еливатқан төрт мәктәпкә 500 миң тәңгидин ианә қилди. Шу күни бу хилдики хәйрихаһлиқ акцияси «Достлуқ» мәһәллисидики А.Розибақиев намидики 153-мәктәп-гимназиядә, Заря Востока мәһәллисидики М.Һәмраев намидики 150-оттура мәктәптә вә Түрксиб наһийәсидики 85-рус-уйғур мәктивидә давамлишип, милләтпәрвәр ханим-қизлар устазларға өзлириниң изгү тиләклирини изһар қилди.

  Бәхтишат СОПИЕВ.

СҮРӘТТӘ: Клара Шардинова (оттурида) 101-мәктәп-гимназияниң рәһбәрлиги вә оқуғучилири арисида.