• Хәйрихаһлиқ
• 22 Қараша, 2013

Өсмүрләргә шатлиқ һәдийә қилди

Йеқинда Әмгәкчиқазақ наһийәсиниң Ават йезисидики Мәдәнийәт өйидә «Яш өсмүргә шатлиқ һәдийә қил» намлиқ хәйрихаһлиқ акция болуп өтти.Мәзкүр акция наһийәлик билим бериш бөлүми тәрипидин уюштурулуп, униңға тәвәдики Ө.Муһәммәдий намидики, И.Жансүгиров намидики вә Әмгәк оттура мәктәплириниң устазлири З.Һошурова, А.Нөкибаева, А.Бастаубаева йеқиндин яр-йөләк болди. Бәзидә күндилик һаятимизда биз пәқәт өз һәләкчилигимиз билән болуп, әтрапимизда ғәмхорлуққа муһтаҗ җанларниң бар екәнлигини әстин чиқирип қойимиз. Мошуни инавәткә алған наһийәлик билим бериш бөлүми Әмгәкчиқазақ наһийәсидә истиқамәт қилидиған сахавәтлик инсанларни мәзкүр чарә-тәдбиргә тәклип қилипту. Кәч башлиништин илгири сөзгә чиққан наһийәлик билим бериш бөлүминиң вәкили З.Тултаева бу хәйрихаһлиқ акцияниң наһийә даирисидә дәсләпки қетим өтүватқанлиғини ейтип, һамийларға өзиниң миннәтдарлиғини изһар қилди. Андин кейин сөзгә чиққан Ават йезилиқ округиниң һакими Ерғали Байбөриев бүгүнки ихтисадий қийинчилиқ пәйттә хәйрихаһлиқ билән изгүлүктин чәтнимәй, роһий байлиқни үстүн қөрүп, муһтаҗларға ғәмхорлуқ көрситиватқан жутдашлириға өзиниң рәхмитини ейтти. Шуниңдин кейин Е.Байбөриев билән З.Тултаева мошу тәвәдә яшайдиған аилә шараити төвән вә имканийити чәкләнгән яш өсмүрләрни новәт билән сәһнигә тәклип қилип, уларға маддий соғиларни тапшурди.

Мәшүр САСИҚОВ.