• Кичик вә оттура тиҗарәт
• 30 Қаңтар, 2014

Сүпити жуқури, баһаси төвән

Яркәнттин Алмутиға иш издәп кәлгән яғашчи Алимҗан Иминов (сүрәттә оңда)  шәһәрдики ишсизларниң маканиға айланған Сейфуллин проспектида яки «Алтын Орда» базирида тенәп-тәнтиригини йоқ. У уттур шәһәрниң Султанқорған мәһәллисигә орунлашқан «Фатима» ширкитигә келип йолуқиду.У йәрдә пәқәт ханим-қизларниң ишләйдиғинини ейтқан ширкәт мудири Әквәрҗан Шәрипов, бу жигитниң дәрия атлап кәлгәнлигини инавәткә елип, «Қолуңиздин қандақ иш келиду?» дәп сориди. — Мән яғашчи, — деди у. — Сиз ишқа қобул қилиндиңиз, — деди ширкәт мудири мийиғида күлүмсиригән һалда. Ширкәт мудири көп баш қатурмиди. Әтисила Алимҗан Иминовқа бир еғиз өйни аҗритип, ширкәтниң йеңи яғашчилиқ цехини ечип бәрди. — Немә ясаймән, — сориди Алимҗан Турғанҗан оғли. — Ширкәтниң җай-җайларда бирнәччә идариси бар. Сиз шуларға җиһаз ясайсиз, қени әмсә, һүнириңизни көрситиң, — дәп униң ишиға ақ йол тилиди. Мәлидики яғашчилиқни шәһәрниңкигә селиштуруп болмайду. әлвәттә.  Амма Турғанҗан һеч мәңдимәстинла ишқа киришип кәтти. У «Фатима» ширкитиниң барлиқ идарилирини җиһаз билән тәминләшкә бар күч-ғәйритини сәрип қилди. Мудирниң бу яғашчини ишқа елип хаталашмиғанлиғиға көзи йәтти. У бир айниң ичидә ширкәтниң барлиқ идарилиригә заманивий җиһазларни ясап чиқти. Бир күни «Фатимаға» кийим-кечәк сетивелиш үчүн кәлгән шәһәрдики бағчиларниң мудирлириниң бири, идаридики чирайлиқ җиһазларни көрүп: «Силәр җиһазму ясамсиләр?» дегән соал билән мураҗиәт қилиду. Мана шуниңдин кейин ширкәт мудириға «Фатима» намлиқ җиһаз ишләпчиқириш цехини ечиш ойи кәлди. Бу 2012-жил еди. Яғашчилиқ цехиға дәсләпки буйрутма ширкәтниң турақлиқ херидари болған шу бағчә мудиридин келип чүшти. Шуниңдин кейин Алимҗанниң мәслиһити билән ширкәт мудири яғашчилиқтин хәвири бар йәнә алтә адәмни ишқа тәклип қилди. Шундақ қилип, он күнниң ичидила әшу бағчә җиһазлар билән толуқ тәминләнди. «Фатиманиң» әрзән һәм жуқури сүпәтлик җиһази тоғрилиқ хәвәр тез аридила шәһәр турғунлири арисиға пур кәтти. Уларниң бәзилири ашхана, меһманхана җиһазлирини ясап бериш илтимаси биләнму мураҗиәт қилишқа башлиди.Қоли әплик Алимҗан талай турғунларниң көңлидин чиқти. Шу жили язлиқ тәтилни Алимҗан кәсипдашлири билән мәктәптә өткүзди. Ениғирағи, буйрутма бойичә шәһәрдики мәктәпләрниң бириниң җиһазлирини йеңилиди. Хошаллиғи чәксиз болған устазлар билән оқуғучилар йеңи оқуш жилини йеңи җиһазлар билән башлиди. Мәктәп рәһбәрлиги җиһаз ясиғучиларниң әмгигини жуқури баһалап, ширкәтниң намиға өзлириниң миннәтдарлиқ хетини әвәтиду. Бу ширкәт мудири үчүн күтүлмигән йеңилиқ болди. Амма кичик вә оттура тиҗарәтниң немә екәнлигини яхши чүшинидиған тәдбирчан рәһбәр җиһаз ясиғучиларниң «биз күндин-күнгә маһаритимизни ашуруватимиз» өсүватимиз» дәп мәйдисигә урушиға йол қоймиди. Биринчидин, ширкәт мудири тәбиитидин  кичик пейил инсан. Иккинчидин, махтиниш үчүн башқа ширкәтләр қатарида әң болмиғанда шәһәрлик конкурсқа иштрак қилиш керәк еди. Булту «Фатиманиң» устилири дөләт буйрутмисиға бенаән, Шәмәй шәһиридики әдлийә университетиға җиһаз ясап бәрди. Университет устазлири йеңи оқуш жилиниң дәсләпки күнидики биринчи дәрисни йеңи җиһазларни ясап бәргән алмутилиқ «Фатима» ширкитигә беғишлапту. Мундақ йеқимлиқ хәвәр ширкәт хадимлириға, әлвәттә, илһам беғишлиди.Мана шуниңдин кейин «Фатиманиң» җиһаз ясиғучилири йәнә төрт қетим дөләтлик мәһкимиләр үчүн җиһаз ясаш буйрутмисини утувелиш имканийитигә егә болди. Кейинки қетим улар Астана шәһиридики Евразия университетиниң студентлирини йеңи, заманивий үлгидики партиларға олтарғузди. Җумһурийәттики әң чоң билим дәргаһлириниң бири һесаплинидиған мәзкүр университетниң рәһбәрлиги бу ширкәт билән буниңдин кейинму һәмкарлишип ишләш нийитиниң барлиғини изһар қипту. Яркәнттин Алмутиға иш издәп келип, өзини «яғашчи» дәп тонуштурған кам сөзлүк Алимҗанни һазир тонумайсиз. Яқ, у яхши тәрипигә өзгәрди. Пәқәт яғашчила әмәс, маһир уста, җиһазчи, дизайнер аталди. Әң әвзили, өзиниң сөйүмлүк кәспиниң қир-сирлирини техиму мукәммәл өзләштүрди. Бу уста вә униң җиһазлири тоғрилиқ әхбаратни 239-89-94 телефони арқилиқ елишқа болиду. «Фатиманиң» җиһазлириниң херидарлириниң көпийишидә Алимҗан Турғанҗан оғлиниң әмгиги бебаһа. У һәм дизайнер сүпитидә өйүңизниң қәйиригә қандақ җиһаз керәклигини тәпсилий ейтип берәләйду. Буниң үчүн у сиздин һәқ төләшниму тәләп қилмайду. Әң әвзили сиз, сүпити жуқури, баһаси әрзән җиһазлиқ болуп қалисиз.

 Бәхтишат СОПИЕВ.