• Кичик вә оттура тиҗарәт
  • 20 Наурыз, 2014

Ишбиләрмәнләргә қорған болиду

Мәлумки, мәмликәт Президенти кичик вә оттура тиҗарәтни елимиз тәрәққиятиниң асасий саһаси сүпитидә тәрипләп, униң риваҗлиниши үчүн барлиқ мүмкинчиликләрни сәпәрвәрликкә кәлтүрүш вәзиписини қойди. Дөләт рәһбириниң мәмликәт тиҗарәтчилирини қоллап-қувәтләш мәхситидә мошу жилниң апрель ейидин башлап 2015-жилниң 1-январиғичә кичик вә оттура тиҗарәт субъектлирини тәкшүрүшкә мораторий елан қилғиниму шу вәҗидин. Йеқинда Уйғур наһийәлик һакимийәтниң мәҗлисләр залида наһийә һакими Көйүмчан Өмәровниң риясәтчилигидә өткән тиҗарәтчиләрниң баш қошушида Вилайәтлик тиҗарәтчиләр палатисиниң мудири Ләззәт Чинкисбаева мәзкүр палатиниң наһийәлик шөбисиниң өз паалийитини рәсмий түрдә башлиғинини хәвәрләп, униң рәислигигә тайинланған Муслим Амангелдини тонуштурди. Ләззәт Алтынбек қизи, шундақла тиҗарәтчилик саһасида қелиплишиватқан иҗабий өзгиришләргә тохтилип, елимиз Президентиниң бу йосундики тоғра қарар вә дадил қәдәмлири саһа муһитини сағламлаштурушқа һәм тиҗарәтчиләр мәнпийитини қоғдашқа қаритилғанлиғини тәкитлиди. Тиҗарәтчиләр мәнпийитини қоғдап, паалийитиниң риваҗлиниши үчүн қолға елиниватқан ениқ тәдбирләргә тәпсилий тохталған натиқ  тиҗарәтчиләрниң иҗтимаий җавапкәрлиги һәққидә сөз қозғап, бүгүнки күндә күндилик истимал товарлар баһалирини турақлаштурушқа күч чиқиришқа дәвәт қилди. Андин у әвлаттин-әвлатқа мирас болуп өтүватқан қолһүнәрвәнчиликни риваҗландуруп, мошу вә башқиму йөнилишләрдә аиләвий тиҗарәтни тәрәққий әткүзүш мәсилисигә көңүл бөлүш лазимлиғини тәкитләп өтти. Умумән, тиҗарәтчилик саһасида 43 дөләтлик программа моҗут болуп, уларда тиҗарәтчиләр үчүн көплигән имтияз вә йеникчиликләр қараштурулған. Ениқлинишичә, буниңдин  тиҗарәтчиләрниң мәлум қисми хәвәрсиз қалмақта. Мәзкүр саһаниң паалийитигә тәкшүрүш жүргүзидиған органларниң  асассиз вә қанунсиз иш-һәрикәтлиригә нарази болған наһийә тиҗарәтчилириниң шикайәтлири билән саһаға бағлиқ көплигән соалларға җавап бәргән Ләззәт Чинкисбаева билән униң орунбасари Қанат Қабдиев кәлгүсидә баш-баштақлиққа йол берилмәйдиғанлиғини тәкитлиди. Шундақла вилайәтлик малийә полицияси, прокуратура вә селиқ башқармиси оттурисида өзара һәмкарлиқ тоғрилиқ меморандум имзалинип, Талдиқорған шәһиридә һәр һәптиниң пәйшәнбә күни  малийә полицияси вәкилиниң қобулханиси ишләйдиғанлиғи қәйт қилинди. Әнди наһийәдә «Даму» фондиниң тиҗарәтчиләрни қоллаш мәркизи ечилиду. Мәзкүр мәркәз саһаға аит көплигән мәсилиләр бойичә тиҗарәтчиләргә һәқсиз хизмәт көрситип, мәслиһәтләр бериду. Тәкитлинишичә, Тиҗарәтчиләр палатисиниң паалийитини униңға әза болған тиҗарәтчиләр ишбиләрмәнлик муһитиниң рейтинги бойичә баһалайду. Шу күни Тиҗарәтчиләр палатиси наһийәлик шөбисиниң идариси тәнтәнилик рәвиштә өз ишигини ачти. Ойлаймизки, әгәр мәзкүр идарә тиҗарәтчилиримиз үчүн һәқиқий мәнада қорған болса, наһийә тәрәққиятида кәскин илгириләшниң йүз беридиғанлиғи ениқ.

Махмут ИСРАПИЛОВ.

    Уйғур наһийәси.

1047 рет

көрсетілді

0

пікір

Біздің Telegram каналына жазылыңыз

алдымен сізді қызықтыратын барлық жаңалықтарды біліңіз

Уйғур авази

21 Сәуір, 2021

Жүктеу (PDF)

Редактор блогы

Ершат Моллахун оғли ӘСМӘТОВ

Редактор блогы