• Хәйрихаһлиқ
• 28 Наурыз, 2014

Биз сиз билән биллә, Розигүл!

Гезитимизниң 13-февраль күни чиққан 6-санида «Розигүл ярдәмгә муһтаҗ» сәрләвһилик мақалә йоруқ көрүп, униңда сөз болған Әмгәкчиқазақ наһийәси Қизил Шәриқ йезисиниң турғуни Розигүл Абитованиң һәсрити башқиниң дәрдигә бепәрва қаримайдиған һәрбир қериндашниң жүригини моҗутти. Розигүл — Замандин вә Ғунчәм Абитовларниң кәнҗә қизи. 13 яшлиқ Розигүлниң бир бөриги соғулуп, толуқ ишлимәйватса, иккинчи бөриги өз вәзиписини бари-йоқи он пайизғила атқуруветипту. Һазир Розигүлниң һаяти қил үстидә туриду. Демәк, вақит өткүзмәй, донор бөригини сетивелип, униңға селиш бойичә операция қилиниши керәк. Мундақ операция кам дегәндә бәш миллион тәңгә туридекән. Шу сәвәптин Розигүлниң устазлири — М.Әвезов намидики оттура мәктәпниң мудири Тлеухан Орынбасарова, синип йетәкчиси Гүлзарәм Җапарова вә шу коллективниң башқиму сахавәтлик әзалири униң ата-аниси билән келишип, гезит арқилиқ хәлиққә мураҗиәт қилишни тоғра көргән еди. Нәтиҗидә өткән сешәнбә күни Челәк йезисиниң Мәдәнийәт өйидә җумһурийәтлик, Алмута шәһәрлик, Әмгәкчиқазақ наһийәлик уйғур этномәдәнийәт мәркәзлириниң, Челәк йеза округи һакимийитиниң Челәк йезисиниң жигитбашлириниң, шундақла «Аламәт» продюсерлиқ мәркизиниң уюштуруши билән Розигүлни қоллап-қувәтләш мәхситидә «Меһриван жүрәкләр» намлиқ хәйрихаһлиқ концерт болуп өтти. Риясәтчи Гүлинур Бақиева кәчни ечип, жирақ-йеқиндин кәлгән меһманларни тонуштурди. Уларниң арисида җумһурийәтлик Уйғур этномәдәнийәт мәркизи йенидики Ханим-қизлар кеңишиниң рәиси Сәнәм Беширова, Алмута шәһәрлик Уйғур этномәдәнийәт мәркизи йенидики Ханим-қизлар кеңишиниң рәиси Гүлзарәм Ильясова, Турсунай Иминова башлиған «Җанан» ханим-қизлар клубиниң бир топ әзалири, Әмгәкчиқазақ наһийәлик Уйғур этномәдәнийәт мәркизи рәисиниң орунбасари Айнисәм Вайдинова, Әмгәкчиқазақ наһийәсиниң чоң жигитбеши Турсунмәһәмәт Абдулсемәтов вә башқилар бар. Атап өтүш керәкки, бу күни Челәк йезисиниң 270 орунлуқ Мәдәнийәт өйиниң зали лиқ толуп, өрә турғучиларни һесаплиғанда, адәм сани 400гә йәтти. Бу Розигүлниң дәрдигә һисдашлиқниң ениқ испати болди. Шуни қошумчә қилиш лазимки, Нуралим Варисов, Дилбәр Бурһанова, Луиза Розахунова, Алимҗан Абдуллаев вә «Аламәт» продюсерлиқ мәркизи, «Идиқут» нағра топи, «Баһар» вә «Тәңритағ» миллий чалғу әсваплар ансамбльлири, «Тарим» вокал чалғу ансамбли вә башқилар концертниң қизиқ, шуниң билән биллә тәсирлик өтүшини тәминлиди. Концерт ахирида шу күни жиғилған 581 миң 600 тәңгә Розигүлниң аниси Ғунчәм һәдигә тапшурулди. Розигүл Абитовани қоллап-қувәтләш мәхситигә өткүзүлгән хәйрихаһлиқ концерт 14-апрель күни Қ.Ғоҗамияров намидики җумһурийәтлик дөләт Уйғур музыкилиқ комедия театрида давамлишиду. Розигүлгә ярдәм қолини сунушни халиғучилар болса, ианисини  төвәндики һесап-чотқа әвәтсә болиду. Сбербанк ИИН 630610300344 Счет №:4263451863183827. Рашидәм РӘҺМАНОВА. Әмгәкчиқазақ наһийәси.