• Хәйрихаһлиқ
• 07 Мамыр, 2014

«Меһриван жүрәкләр»

Йеқинда җумһурийәтлик дөләт Уйғур музыкилиқ комедия театрида еғир ағриққа муптила болуп қалған он үч яшлиқ Розигүл Абитованиң давалинишиға ярдәмлишиш үчүн уюштурулған хәйрихаһлиқ концерт болуп өтти.Концертни М.Яқупов намидики 101-мәктәп-гимназияниң «Дилраба» уссул ансамбли әвришим уссуллири билән ачти. Андин мәзкүр чарә-тәдбирниң асасий мәхситини риясәтчи — «Аламәт» продюсерлиқ мәркизиниң рәһбири Қәлбинур Аруп көпчиликкә чүшәндүргәндин кейин, сәһнигә ҖУЭМниң рәиси Шаһимәрдан Нурумовни, Алмута шәһәрлик Уйғур этномәдәнийәт мәркизиниң рәиси Абдуллам Һошуровни, театр мудири Савутҗан Сонуровни вә ҖУЭМ Ханим-қизлар кеңишиниң рәиси Сәнәм Бешировани тәклип қилди. Улар мошундақ бешиға еғир күн чүшкән қериндишимизниң дәрдигә дәрман болушимиз керәклигини тәкитлиди вә өзлириниң ианисини Розигүлниң дадиси Замандин Абитовқа тапшурди. Шундақла натиқлар, залда олтарғанларға мураҗиәт қилип: «Бүгүн силәрниң мошу йәргә келишиңлар — әшу қизчақниң қайғусиға ортақлишип, униңға бир кишилик ярдәм қолуңларни сунғиниңлар», дәп көпчиликкә миннәтдарлиқ билдүрди. Буниңдин бираз вақит илгири Р.Абитоваға яр-йөләк болуш мәхситидә мошундақ чарә-тәдбир Челәк тәвәсидиму өткүзүлгән еди. Әйнә шу концертниң һәм бүгүнкисиниңму утуқлуқ чиқишиға зор төһписини қошқан «Аламәт» продюсерлиқ мәркизиниң рәһбири Қәлбинур Арупниң әмгигини мәмнунийәт билән тилға алған орунлуқ. Шуниң билән биллә мәзкүр хәйрихаһлиқ ишни уюштурғучиларни һәр тәрәптин қоллап-қувәтлигән шәхсләргә, җүмлидин Әмгәкчиқазақ наһийәси Қизил Шәриқ йезисидики М.Әвезов намидики мәктәпниң устазлири Зенәт Турдибақиеваға, Халидәм Қурбатоваға, регионлуқ мәшрәп әһлидин Долқун Разиев билән Абдухелил Тохтәмәтовқа, Челәк региониниң баш жигитбеши Мәһәмәтҗан Савутов рәһбәрлигидики жигитбашлириға уларниң ейтар миннәтдарлиғи чәксиз болди. Шу күни концерттин чүшкән 900 миң тәңгә Розигүлгә ианә қилинди. Мәшүр САСИҚОВ.