• Хәйрихаһлиқ
• 07 Тамыз, 2014

«Ақ жолға» ақ йол

Хәйрихаһлиқ акция/ Йеқинда Талғир шәһиридики Мәдәнийәт өйидә «Ақ жол М» җәмийәтлик фондиниң тәшкил қилинишиға бағлиқ мәрасим болуп өтти.  Уни фонд рәиси Рошәнгүл Тохтахунова ечип, шәһәрдә өзи охшаш накаларниң дәрдигә дәрман болуш мәхситидә барлиққа кәлгән мәзкүр фонд һәққидә қисқичә ейтип өтти. Өз новитидә у фондниң тәшкил қилинишиға йеқиндин ярдәм көрсәткән «АРДИ» нака балилар ата-анилириниң ассоциациясигә,  «Казкоммерцбанкниң» наһийәлик шөбисиниң хадимлириға, «Аружан Саин» фондиға, җәнубийкореялик Че Енг Сокиға Панфилов спорт комплексиниң мудири Константин Муратидиға, Снежана Герлицкаяға, Тайирҗан Махмутовқа вә Клара Қасимоваға өзиниң миннәтдарлиғини изһар қилди. Андин сәһнигә көтирилгән Талғир  шәһириниң турғуни буниңдин төрт жил илгири он яшлиқ оғлиниң көзи көрмәй қелип, хелә җапаларни тартқанлиғини сөзләп бәрди. — Һәтта оғлум өзиниң җениға қәстлиқ қилмақчи болди. Кейин бизниң аилә Рошәнгүл билән йеқиндин тонуштуқ. Мана шуниңдин кейин оғлумизниң һаятқа болған көзқариши өзгәрди. Рошәнгүл әйнә шундақ қолидин иш келидиған инсан. Униң фондниң ишини җанландуруп, накаларға ғәмхорлуқ қилидиғанлиғиға ишинимән. Ахирида тамашибинлар нака балилар тәрипидин тәйярланған концертни тамашә қилди. Концертта болупму Мәликәм Тохтахунова тәрипидин иҗра қилинған «Не сдавайся» намлиқ фонд гимни көпчиликкә алаһидә тәсир қилди. Мәрасимдин кейин меһманлар Рошәнгүл иҗаригә елип ишләватқан үч бөлмилик пәтиргә берип, у йәрдики нака балилар үчүн яритилған шараитларни көздин кәчүрди. Һамийлар үч бөлмилик пәтирни җабдуқларға толтурупту. У йәрдә йүзгә йеқин бала спортниң һәрхил түрлири вә башқиму саламәтликкә пайдилиқ нәрсиләр билән шуғуллиниветипту. Қасимҗан ЧОРУҚОВ. Талғир шәһири.