• Хәйрихаһлиқ
• 09 Қазан, 2014

Балиларға базарлиқ

Кейинки вақитларда тиҗарәтчилик билән шуғуллиниватқан сәнъәткар Шатлиқ Худайқулов хәйрихаһлиқ паалийәттиму алдинқи қатарда болушқа интилмақта. У Роза һейтида «Пәрзәнт» балилар өйидә тәрбийилиниватқан житимларни «Җанан» кафесиға тәклип қилип, меһман қилған еди. Бу қетим Қурван һейтида у «Арди» накалар өйидә тәрбийилиниватқан балиларниң бешини қошти. Балилар алди билән уюштурғучиларниң иллиқ ләвзини аңлиди. Андин «Үмүт» базириниң мудири, Талғир наһийәлик мәслиһәтниң депутати Тиләк Йүсүпов, «Қайрат» мәһәллисиниң жигитбеши Мәрүп Ахунов балиларни Қурван һейти билән тәбриклиди. Андин «Арди» балилар өйидә тәрбийилиниватқан Таһир Өмәров билән Динара Шәрипованиң (сүрәттә) уссули тамашә қилинди. Әлвәттә, бу икки нака балиниң усули меһманларда наһайити еғир тәсират қалдурди. Шуниңдин кейин балиларни җумһурийәтлик Уйғур этномәдәнийәт мәркизи йенидики Нураний анилар кеңишиниң рәиси Гүлҗаһан Муратова, «Уйғур авази» гезитиниң баш муһәррири Ершат Әсмәтов, тиҗарәтчи Билал Һошуров, «Дәрвишләр» топиниң солисти Райим Һәмраев вә башқилар Қурван һейти билән тәбрикләп, мәзкүр мәйрәмни уюштурушта көп күч чиқарған Шатлиқ Худайқулов, Руслан Авутов, Шерияз Худайқулов, Батур Ғаппаров, Һашим Арзиев қатарлиқ сахавәтлик инсанларға өзлириниң миннәтдарлиғини изһар қилди. Бәхтишат СОПИЕВ.