• Кичик вә оттура тиҗарәт
• 25 Желтоқсан, 2014

Ата мәслиһити билән

Көктал йезисидики «Кәрим» җавапкәрлиги чәкләнгән йолдашлиғи наһийәдә тиҗарәт саһаси бойичә тәшкил қилинған дәсләпки қурулумлардин болуп һесаплиниду. Бу ишни алий билимлик инженер-механик, илгири мошу йезиниң нами билән аталған совхозда өз мутәхәссислиги бойичә әмгәк қилип, ишбиләрмәнлиги һәм тәдбирчанлиғи билән көзгә чүшкән Аблиз Суфиянов қолға алған еди. Сөзара шуни ейтип кетиш керәкки, униң мундақ дадил қәдәм бесишиға атиси Кәрим бирдин-бир сәвәпкар болди. Чүнки мәрһум Улуқ Вәтән урушиға қатнишип, қанлиқ җәң мәйданлирида талай иссиқ-соғларни бешидин өткүзүп, жутқа аман-есән қайтип келип, қириқ жиллиқ һаятини мошу совхозда ишлиди. Май заводида инспектор, қойма башлиғи, бригадир, ферма башлиғи вә егилик мудириниң орунбасари қатарлиқ хизмәтләрни шәрәп билән атқуруп, йеза егилиги ишләпчиқириши бойичә мол тәҗрибә топлиди. Заманниң өзгиришигә қарап, пәрзәнтлириниң иш-паалийитигә тоғра йөнилиш берип, истиқбаллиқ иш-оқәтни қолға елишиға түрткә болди. Атиниң әқил-мәслиһити билән иш башлиған Аблиз дәсләпки пәйтләрдә қәндәләт мәһсулатлирини ишләпчиқириш, сүтни қайта ишләш, көмүқонақ өстүрүш вә башқиму ишлар билән мәшғул болди. Йеңи иш орунлириниң ечилип, жутдашлириниң әмгәк қилишиға имканийәт яратти. Шундақ қилип, мәслиһәтлик һәм һәмкарлиқ билән башланған тиҗарәт вақит өткәнсири риваҗлинип, иҗабий нәтиҗисини беришкә башлиди. Йолдашлиқниң паалийити турақлишип, ихтисадий җәһәттин тәрәққий етиватқанлиғи әйнә шуниң испати. Бүгүнки күндә бу йәрдә асасән нәсиллик қуш өстүрүш йолға қоюлған. Тоху ғаз вә өдәк өстүрүлүп, сүпәтлик мәһсулат йетиштүрүлүватиду. Уларниң бесим көпчилиги анилиқ болуп, мәһсулдарлиғи һәм чапсан өсүп, йетилидиғанлиғи билән пәриқлиниду. Буниңдин төрт жил илгири бройлер тохулар — Голландиядин, өдәк Башқурстандин, ғаз болса, Бақанастин кәлтүрүлгән еди. Һазир уларниң Яркәнт тәвәсиниң шараитиға лайиқлаштурулған нәсли йетиштүрүлүп, көп чиқимға учримай, қатарға қошулуватиду. Шуни ейтиш керәкки, қуш егилигиниң қаидилиригә толуқ риайә қилинип, иш жүрүзүлүватқачқа, мәһсулатниң сүпити херидарларниң тәливини қанаәтләндүрүватиду. Буниңға һәр  жили 150 — 170 тонна қуш гөшиниң йетилдүрүлүватқанлиғи яхши мисал болалайду. Йеңи жилдин тартип қуш өстүрүш билән шуғулланғучилар үчүн тухум вә җүҗиләрни сетиш қолға елинмақчи. Йолдашлиқ паалийитини асасий җәһәттин қуш егилиги тәшкил қилсиму, башқа саһаларниң чәттә қеливатқини йоқ. Мәсилән, хелә жиллардин бери навайхана қиш-йези тохтимай ишләп келиватиду. Тәвлүгигә бир тонна нан-тоғач йеқилип, дөләт мәһкимилири коллективлири арисида таритиливатиду. Чарвичилиқниму әстин чиқармай, мошу күнләрдә йүз баш қара мал беқилмақта. Буниңдин ташқири, 150 гектар йәрдә көмүқонақ өстүрүлүп, униңдин елиниватқан һосул ички еһтияҗ үчүн сәрип қилиниватиду. Йолдашлиқта әллик адәм иш билән тәминләнгән. Уларниң айлиқ иш һәққи өз вақтида бериливатиду һәм маддий-мәнивий җәһәттин рәғбәтләндүрүлүп кәлмәктә. Бу «Тиҗарәтниң йол хәритиси — 2020» дөләт программисиға изчил риайә қилиниватқанлиғиниң испатидур. Биз йолдашлиқниң хәйрихаһлиқ паалийити биләнму тонуштуқ. Гәрчә, бу һәқтә Аблиз Кәрим оғли әтраплиқ тохталмиған болсиму, йезиниң баш жигитбеши Рәхимҗан Яқуповтин нурғун яхши гәпләрни аңлидуқ. Мәсилән, жут билән һәмнәпәс яшап, маддий җәһәттин ярдәм көрситиш — коллектив үчүн қелиплашқан адәткә айлинип қалған екән. Болупму ветеранлар билән тәминати начар аилиләргә һәрқачан яр-йөләк болуп келиветипту. Һазир муштири топлаш ишиға җавапкәрлик билән қарап, көкталлиқлар арисида «Уйғур авази» гезити билән башқиму нәширлиримиз оқурмәнлириниң көпийишигә маддий җәһәттин ярдәмлишип, тегишлик һәссисини қошуватқанлиғини атап өткән орунлуқ. Нурәхмәт ӘХМӘТОВ. Панфилов наһийәси. Сүрәтләрдә: «Кәримниң» тирикчилиги әйнә шуниңдин ибарәт. Бәхтишат СОПИЕВ чүшәргән сүрәтләр.