• Әхбаратлар еқими
• 13 Ақпан, 2015

Һава медицинисиниң ярдими чоң

Елимиз саламәтликни сақлаш саһасини тәрәққий әткүзүштә транспорт медициниси муһим роль ойнаватиду. Қазақстан Җумһурийити Саламәтликни сақлаш вә иҗтимаий тәрәққият министрлигиниң мәлуматлири бойичә, 2011 — 2015-жилларға бәлгүләнгән «Саламатты Қазақстан» дөләт саламәтликни сақлаш саһасини тәрәққий әткүзүш программисида көздә тутулған транспорт медицинисиға қазақстанлиқлар чоң үмүт артиватиду. Чүнки у, қәйәрдә яшиғанлиғидин қәтъий нәзәр, медицина ярдимигә муһтаҗ болуватқан һәрқандақ адәмгә чапсан вә сүпәтлик ярдәм көрситәләйду. Әлвәттә, буниңда 2011-жилдин буян тәрәққий етиватқан санитария авиациясиниң ярдими бебаһа. «Қазақстан үчүн транспорт медициниси наһайити муһим әһмийәткә егә вә биз уни тәрәққий әткүзимиз», дегән еди Дөләт рәһбири Нурсултан Назарбаев 2011-жили 28-январьда Қазақстан хәлқигә йоллиған Мәктүбидә. Нәқ шу чағда медицинилиқ мәхсәттики һава транспорт васитилири паркини шәкилләндүрүш қолға елинди. Бүгүнки күнгә қәдәр барлиқ регионларда санитария авиацияси арқилиқ транспорт ярдими көрситиливатиду. Өткән жили авиатранспорт хизмитини көрсәткүчиләрниң ихтиярида 15 авиация ширкити болди. 2014-жилниң йәкүни бойичә җумһурийәттә санитария авиациясиниң хизмити 1875 қетим һаваға көтирилип, 20366 бемарға хизмәт көрсәтти. Селиштуруш үчүн тәкитләймизки, 2013-жили улар 1355 қетим чақиртилған еди. Әнди регионлар бойичә алсақ, йүз миң адәмгә чаққанда, Қизилорда (26,3), Шәрқий Қазақстан (24,7), Павлодар (18,2), Атырав (17,1), Ақтөбә (14,8), Қостанай (13,1), Ғәрбий Қазақстан (12,3), Шималий Қазақстан (12,2) вә Маңғыстав (11,2) вилайәтлиридә оттура җумһурийәтлик дәриҗидин жуқури туриду. Өткән жил билән селиштурғанда, бу көрсәткүчниң Алмута, Ақмола, Ақтөбә, Шәрқий Қазақстан, Җамбул, Қостанай вә Қизилорда вилайәтлиридә өскәнлиги байқалмақта. Буниң өзи қазақстанлиқларниң ихтисаслаштурулған вә квалификациялик медицина ярдимидин пайдилиниш дәриҗисиниң өскәнлигини билдүрсә керәк. Шундақла бирқатар чәт әлләрниң (Сингапур, Моңғулстан, Бирләшкән Әрәп Әмирликлири, Россия вә АҚШ) клиникилиридинму ағриққа дучар болған елимиз гражданлири кәлтүрүлди.