• Җәмийәтлик тәшкилатларда
• 18 Мамыр, 2012

Йеңи рәис сайланди

Йеқинда Талғир наһийәлик Уйғур этномәдәнийәт мәркизиниң жиллиқ һесават жиғини болуп өтти. Униңға җумһурийәтлик Уйғур этномәдәнийәт мәркизиниң рәһбәрлиги қатнашти. Жиғинға Алмута вилайәтлик Уйғур этномәдәнийәт мәркизиниң рәиси Реһимҗан Тоқаев риясәтчилик қилди. Талғир наһийәлик Уйғур этномәдәнийәт мәркизиниң рәиси Розахун Дугашев жиғинға келиштин вә һесават бериштин баш тартти. Шундиму Талғир шәһиридин вә Қизил Ғәйрәт, Туздыбастав, Бесағаш, Колхозчи, Гүлдала йезилиридин кәлгән наһийәлик Уйғур этномәдәнийәт мәркизи шөбилириниң рәислири, мәзкүр жутларниң жигит башлири, ханим-қизлар кеңәшлириниң рәислири вә муәллимләр — А.Розахунов, Р.Айтбақиев, С.Йолдашев, И.Розиев, Х.Турсунов, З.Авдинов, А.Һошурова, С.Һашимова вә башқилар өз сөзлиридә наһийәлик Уйғур этномәдәнийәт мәркизиниң қолға кәлтүргән утуқлири билән бәзи камчилиқлириға тохталди. Шуниңдин кейин сөзгә чиққан ҖУЭМниң рәиси Әхмәтҗан Шардинов җумһурийәтлик Уйғур этномәдәнийәт мәркизиниң жиллиқ һесавити алдида барлиқ наһийәләрдә бүгүнкидәк һесават жиғининиң өтүватқанлиғини тәкитлиди. Сөзгә чиққанларниң тәкливи билән Талғир наһийәлик Уйғур этномәдәнийәт мәркизиниң рәислигигә мәзкүр тәшкилатниң Қизил Ғәйрәт йезисидики шөбисиниң рәиси Иминҗан Тохтахунов (сүрәттә) сайланди. Иминҗан Тохтахунов 1950-жили Ғулҗа шәһиригә қарашлиқ Тоққузтара мәһәллисидә туғулған. 1959-жилдин башлап, Қизил Ғәйрәт йезисида яшайду. Талғирдики кәспий-техникилиқ училищени тамамлап, һәр хил орунларда хизмәт қилған. 24 жил мабайнида йезилиқ Уйғур этномәдәнийәт мәркизини башқуруп келиватиду. Талғир наһийәсиниң Пәхрий граждани.

Рабик ИСМАЙИЛОВ.