• Йеңилиқлар
• 16 Қаңтар, 2012

Милләт мәнавиятиниң соғулмас булиғи

11-январь күни Дөләт рәһбири Нурсултан Назарбаев әдәбият вә сәнъәт әрбаплириға Президент вә дөләт стипендиялирини тапшурди. Елимиз мәдәнийитини тәрәққий әткүзүшкә қошқан чоң һәссиси үчүн йүздин ошуқ адәм мукапатланди. Стипендияләр 1995-жилдин тартип һәм хизмәт көрсәткән мәдәнийәт әрбаплириға, һәм келәчигидин үмүт күткүзидиған яшларға тапшурулуватиду. Бийилқи стипендиатларниң арисида Асанәли Әшимов, Бибигүл Төлегенова, Меруерт Өтекешева, Әхмәтҗан Һаширов, Гүлвира Разиева, Гүлнара Дусматова, Анатолий Молодов, Юрий Померанцев, Әмир Бисенғалиев вә башқиму көплигән иҗаткарлар бар. —    Мән көплигән сәнъәт адәмлири ишсиз қалған шу еғир вақитта стипендияләрни тапшурушни башлидим, — дәп тәкитлиди Нурсултан Назарбаев. — Бирақ биз хәлиқ роһий күчиниң соғулмас булиғи болуп хизмәт қиливатқан мәдәнийитимиз әһмийитини һеч қачан әстин чиқармиған. Мәдәнийәтни сақлап қелиш вә тәрәққий әткүзүш мәмликәт тәрәққиятиниң муһим шәрти болуп һесаплиниду. Президент кейинки жилларда мәмликәтниң мәдәний тиклинишигә алаһидә диққәт бөлүнүватқанлиғини тәкитлиди. Мәсилән, бир нәччә жилдин буян «Мәдәний мирас» программиси әмәлгә ашурулуватиду. —    Пәқәт кейинки он жилдила дөләтниң мәдәнийәткә бөлүватқан хираҗити 11 һәссә өсти, — дәп билдүрди Нурсултан Назарбаев. — 18 йеңи театр, 270 мирасгаһ вә 800дин ошуқ китапхана селинди. Пат йеқинда Астанада Миллий оперини салимиз. Бу надир объект болиду. Мәдәнийәт әрбаплири Президентқа тәшәккүр изһар қилип, мәдәнийәт саһасидики ишлириға бир қатар тиләклирини изһар қилди. Мәсилән, атақлиқ музыкишунас Юрий Аравин «Мәдәний мирас» материаллириниң аддий хәлиқкә йәткүзүлүшигә алаһидә тохталди. Нурсултан Назарбаев кинематография тоғрилиқ гәп қилип, яш режиссерларни қазақ киноклассикисидин үлгә елишқа чақирди. Президентниң сөзичә, һазир һеч қандақ мәзмун-маһийити йоқ заманивий ғәрип мәдәнийити бесим болуватқан шараитта миллий мәдәнийәтни сақлап қелиш вә бейитиш керәклигини тәкитлиди. Зиялилар билән болған учришишниң ахирида Нурсултан Назарбаев сайлам мавзусиға тохталди. У турақлиқ тоғрилиқ гәп қилип, уни техиму мустәһкәмләш үчүн пүткүл мәмликәт нурғун ишлиши вә күч чиқириши керәк. —    Мән йеқинқи сайламда хәлиқниң тоғра йолни таллавалидиғанлиғиға ишинимән. У турақлиқни, төзүмлүкни вә милләтләр ара разимәнликни таллавалиду, — дәп хуласилиди Милләт Лидери.