• Әхбаратлар еқими
• 21 Мамыр, 2015

Достанә мунасивәтләр ипадиси

Йеқинда Заря Восток мәһәллисидики Мурат Һәмраев намидики 150-уйғур оттура мәктивидә оқуғучиларниң Қазақстан хәлқи Ассамблеясиниң 20 жиллиғиға беғишланған концерти болуп өтти. Концертни мәктәп мудири Гүльмира Тохтахунова тәнтәнилик ечип, бу күни билим дәргаһиға қәдәм тәшрип қилған меһманларға миннәтдарлиғини билдүрүп, көпчиликни милләтләрара достлуқни мустәһкәмләш даирисидә өтүватқан концертни тамашә қилишқа чақирди. Андин Қазақстанда яшаватқан қазақ, уйғур, өзбәк, рус, украин, корей вә туңган милләтлириниң урпи-адәтлиридин сәһнилик көрүнүшләр қоюлуп, миллий таамлар көргәзмиси уюштурулди. Шундақла оқуғучилар һәрхил тилларда шеирларни ядқа оқуп, нахша-саз вә уссуллири билән һәммини қайил қилди. Концертниң ахирида шаирә Патигүл Мәхсәтова сөзгә чиқип, көпчиликни бу жили нишанлиниватқан қош-қош мәйрәмләр билән тәбрикләп, мәзкүр чарә-тәдбирдә паалийәтчанлиқ көрсәткән оқуғучилар билән устазлар коллективиға рәхмәт ейтти. Шуниң билән биллә Алмута шәһири Алатав наһийәлик Билим бөлүминиң башлиғи Қарлығаш Ақмурзаева, җумһурийәтлик Уйғур этномәдәнийәт мәркизиниң иҗраий мудири Зихруллам Қурванбақиев, Алмута шәһәрлик уйғур этномәдәнийәт мәркизиниң иҗраий мудири Әхтирим Әхмәтова, Заря Восток мәһәллисиниң жигитбеши Йолдаш Зулияров вә башқилар мәрасимниң жуқури дәриҗидә өткәнлигини алаһидә тәкитлиди. Фируза НӘВИРДИНОВА. Алмута шәһири.