• Хәйрихаһлиқ
• 27 Шілде, 2015

Һаҗим аниниң һиммити

Пәйғәмбиримиз Муһәммәд әләйһиссалам «Алла таала әң болмиғанда бир сиқим хорма, һәтта  бир жутум су билән болсиму ғәмхорлуқ қилғанға совап язиду» дегән екән өз һәдислириниң биридә. Аримизда  әйнә шундақ савапқа еришип келиватқан хәйри-еһсанлиқ җанлар аз әмәс. Илгири Яркәнт тәвәсидә яшап, хизмәт қилған, кейинки жилларда Алмута шәһиридә истиқамәт қиливатқан  Гүлҗаһан һаҗим Муратовани әйнә шулар җүмлисидин дәп ейтиш орунлуқ. Һаҗим ана узун жиллардан бери көпбалилиқ, турмуш шараити төвән аилиләр билән баққучисидин айрилип, житим-йесир қалған балиларға маддий җәһәттин яр-йөләк болуп келиватқанлиғидин уйғур җамәтчилигиниң хәвири болса керәк. Болупму Роза-рамзан айлирида қолидин келишичә яхшилиқ қилмиса көңли имин тапмайду. Буни ғәрәзсиз, өзиниң инсаний һәм мусулманчилиқ пәрзи сүпитидә қарап  иш көрмәктә. Йеқинда Гүлҗаһан һәдә Яркәнт шәһәридә болуп, йүз аилигә ун, гүрүч, май вә чай қатарлиқ озуқ-түлүк мәһсулатлирини тарқитип  бәрди. Шуниңғичә  Алмута  шәһиридә — жигирмә, Уйғур наһийәсидә йүз аилигә мошундақ ярдәм көрсәткән екән. Яркәнтлик 87 яшлиқ Реһан ана Рәхимова өз миннәтдарлиғини билдүрүп:      «Гүлҗаһан қериндишим, мону улуқ ай, улуқ  күнләрдә мундақ һиммитиңиз үчүн Алла таала турмуш-тирикчилигиңизгә техиму чоң бәрикәт ата қилғай. Илаһим, саламәтлигиңиз мустәһкәм болуп, һемишәм аман-есән жүрүң», дәп сәмимий тиләк-истәклирини изһар қилди. Шундақла, наһийәлик Уйғур этномәдәнийәт мәркизи  рәисиниң орунбасари Абдусалам Алиев, мәркәз йенидики Ханим-қизлар кеңишиниң рәиси Маһинур Аюповалар билән жигитбашлири Азат Искәндәров, Нуруллам Ваҗитов, Ташмәһәммәт Мәмләков, Нәғмәтҗан Вайитов, Турсун Турдиев, Пәрхат Исламовлар өзлири башқуруватқан мәһәллиләр турғунлири намидин тәшәккүр ейтип, аниниң хәйирлик иш-паалийитигә мувәппәқийәтләр  тилиди. Нурәхмәт ӘХМӘТОВ. Яркәнт шәһири.