• Хәйрихаһлиқ
• 02 Қазан, 2015

Соваплиқ ишлар — житимларға

Дүшәнбә күни жилдиқи әнъәнә бойичә, шәһәрдики «Ақ алтын» ресторанида «Жанұя» балилар өйиниң тәрбийиләнгүчилири хошаллиқ дәмлиригә бөләнди. Балилар өйидә нәқәдәр еғир екәнлигини яхши чүшинидиған Нариман Турсуновниң тәшәббуси билән һәм бир топ хәйри-сахавәтлик инсанларниң һамийлиғида онға йеқин тәрбийиләнгүчиниң туғулған күнлири нишанланди.Риясәтчиниң тәкливи билән туғулған күн егилири залға киргәндин кейин, улар һәрхил соал-җавап оюнлириға қатнашти. Андин улар Қазақстан эстрада юлтузлири Медеу Арынбаев, Сейфуллин Жолбарыс, Таһир Ибрагимов вә яш нахшичи Қудрәт Өмәровниң нахшилиридин, атақлиқ уссулчи Айнура Аюпованиң шагиртлири иҗра қилған һәрхил милләт уссуллиридин бәһримән болушти. Шуниң билән биллә һаятида мундақ хошаллиқ дәқиқиләр күндә болувәрмәйдиған балилар өйиниң жигит-қизлири уссулғиму чүшти. Өз новитидә, меһманлар туғулған күн егилирини сәмимий тәбрикләп, атиған соғилирини тапшурди вә ата-аниға зар болған пәрзәнтләргә турақлиқ ярдәм қолини сунуп келиватқан Нариман Турсунов һәққидә иллиқ пикирлирини изһар қилип, униң бу паалийитигә һәрдайим яр-йөләк болидиғанлиғини йәткүзди. Ахирида тәшәббускар Нариман Турсунов сөз елип, «Жанұя» балилар өйиниң тәрбийиләнгүчилиригә унтулмас дәмләрни һәдийә қиливатқан шәхсләргә, җүмлидин «Ақ алтын» рестораниниң ғоҗайини Сулейман Ахмедовқа, гөдәкләргә соғиларни тәйярлиған «Кенжехан-2» базириниң мәмурийитигә вә шәхсән униң малийә мудири Алимҗан Сейитовқа, һәрҗәһәттин һамийлиқ қилған Мухтәрҗан Мәңсүровқа, Қурванҗан Мәшүровқа, балиларни ресторанға лимузин билән йәткүзгән Мәрипҗан Әхмәтовқа, Алмута шәһәрлик «Ардагер» авған уруши ветеранлири вә накалириниң җәмийәтлик бирләшмиси әзалириға вә сәнъәткарларға миннәтдарлиқ билдүрүп, ишлириға амәт тилиди. Мәшүр САСИҚОВ.