• Хәйрихаһлиқ
• 08 Қазан, 2015

«Әй, қудрәтлик Алла, тәбиий апәт, хейим-хәтәрдин өзәң сақла!»

Йәкшәнбә күни Алмута шәһириниң Қарағайлы йезисида мана мошундақ  нийәттә хәтмә-қуръан өткүзүлди. Униңға қарағайлылиқлардин ташқири, сәл ақивитидин зәрдап чәккәнләргә ярдәм қолини сунған башқа жутларниң сахавәтлик инсанлириму қатнашти. Қуръан тилавәт қилинғандин кейин йезиниң жигитбеши Қасимҗан Исрайилов жут бешиға күн чүшкәндә һисдашлиғини билдүргән меһир- шәпқәт егилиригә жутдашлири намидин сәмимий миннәтдарлиғини билдүрди. Андин сөз новитини алған җумһурийәтлик Уйғур этномәдәнийәт мәркизи йенидики Жигитбашлири кеңишиниң рәиси Абдурешит Мәхсүтов, Алмута шәһәрлик Жигитбашлири кеңишиниң рәиси Инәмҗан Худайбәрдиев, шәһәрлик «Алматы ақшамы» гезитиниң мухбири Нурлан Суюнов, «Таусамалы» микрорайониниң турғуни, пешқәдәм устаз Төлеш Стамбеков, жут ақсақили Бекежан Данылбаев, нураний анилар  Сағия Жүкеева вә Тудан Тохтиқулинова бирлиги, өмлүги ярашқан көпмилләтлик Қазақстан хәлқиниң бир-биригә болған меһриванлиғиниң, хәйрихаһлиғиниң нәқәдәр улуқлуғини, униң болупму қайғу-һәсрәттә яққал байқилидиғанлиғини тәкитлиди. Қазақ қериндашлар шундақла өз сөзидә дайим сахавәтлик үлгисини намайиш қилип келиватқан уйғур хәлқиниң намиға сәмимий вә иллиқ тиләклирини ейтишти. Һәқиқәтәнму, Қарағайлы апити һечбир адәмни бепәрва қалдурмиди. Мундақ пәйттә һәрқачан чәмбәрчас тәйяр туридиған уйғур җамаәтчилиги тез арида ярдәм уюштурушқа киришти. Җүмлидин Алмута шәһәрлик Жигитбашлири кеңишиниң рәиси Инәмҗан Худайбәрдиев вә униң орунбасари Бурһандин Таҗидинов дәрһал тәшкилий топ қуруп, той-төкүн, нәзир-чирақларда тәшвиқат ишлирини башлаветиду. Достлуқ мәһәллиси жигитбешиниң орунбасарлири Әркин Имрәмзиев, Махмут Һашимов, Абдуварис Тохтахунов, Ханим-қизлар кеңишиниң рәиси Ғунчәм Худайбәрдиева вә әзалири Гүлбәһрәм Дарбақулова, Халидәм Аблимитова, Зенәтбүви Саттарова, Гүли Тохсунова қатарлиқ жут активистлири кочиму-коча меңип, ианә топлайду. Апәт йүз бәргән күнила шу җайға Сәдирдин Әһәтов, Реһимҗан Семәтов, Пәрһат Сайитов, Инәмҗан Худайбәрдиев, шундақла Қудрәт Өмәров, Абдукерим Арупов, Қаһар Манамов рәһбәрлигидики мәшрәпләр әһли қазан-қазан полулар йәткүзсә, Шөһрәт Сәлимов (90 миң тәңгә вә 5 миң тәңгилик йемәк-ичмәк) вә Шөһрәт Өмәров (20 миң тәңгилик озуқ-түлүк) өзлири туридиған коча намидин халис ярдимини көрситиду. Навайлардин Иврайим Тохтахунов мәшрәп әһли намидин 20 нан, 200 тоғач, Расимә Тохтахунова 200 тоғач ианә қилиду. Яшлар тәрипидин бир һәптилик һашарму уюштурулиду. Достлуқ мәһәллисиниң әйнә шундақ хәйрихаһлиқ паалийитидин кейин Алмута вә униң әтрапидики жутлардиму ианиләр топлинип, сәл ақивитидин зәрдап чәккәнләргә әвәтилиду. Биз жуқурида ейтилған хәйрихаһлиқ паалийәт егилирини «реклама» қилиш үчүн бериватқинимиз йоқ. Бу уйғурларниң бешиға күн чүшкән адәмниң, динидин, миллитидин қәтъий нәзәр, дайим қайғусини бөлүшүшкә тәйяр туридиған меһир-шәпқәтлик, кәң пейиллиқ милләт екәнлигини испатлайдиған рәқәмләр билән фактларла, халас. Илаһим, аримизда мошундақ хәлқимизниң пәқәт яхши намини чиқиридиған әзимәтлиримиз көпәйсекән дәймиз.

Ершат ӘСМӘТОВ.

Алмута шәһири Қарағайлы йезисида йүз бәргән сәл ақивитидин зәрдап чәккәнләргә җәнубий пайтәхттики ианә топлиған жутларниң тизими

Жиғилған ианә (тәңгә һесавида): Заря Востока (жигитбеши Ярмәһәмәт Кебиров) — 300 000; Қалқаман-2  (жигитбеши Үсүпҗан Турдимәмәтов) — 294 700; Горный Гигант (жигитбеши Абдурешит Мәхсүтов) — 200 700; Достлуқ (жигитбеши Инәмҗан Худайбәрдиев) — 198 000; Султанқорған (жигитбеши Ғәйрәт Мәмәтәлиев) — 105 000; Һөҗҗәт (жигитбеши Тудахун Таипов) — 75 000; Ақбулақ (жигитбеши Турғанҗан Ибрагимов) — 60 000; Малая станица (жигитбеши Пазилҗан Исхақов) — 55 800; Йеңи һаят (жигитбеши Абдукерим Абубәкиров) — 50 000; Тастақ (жигитбеши Имам һаҗим Мәхсүтов) — 50 000; Ахун (жигитбеши Мәһәмәтҗан Амутов) — 30 000; 1-12-микрорайонлар (жигитбеши Абдухелил Бавдинов) — 12 000. Буниңдин ташқири Талғир наһийәси Бесағаш йезисиниң җамаәтчилигидин (жигитбеши Әхмәтҗан Ахмоллаев) 100 000 тәңгә жиғилди. Алмута шәһири Бостандық наһийәсидики уйғурлар 420 миң тәңгә ианә қилди. Шундақла башқиму жутларниң жигитбашлири билән ханим-қизлар кеңәшлири өз алдиға халис ярдимини көрсәтти.