• Әхбаратлар еқими
• 15 Желтоқсан, 2015

«Алтын сапа» алға башлайду

Дөләт рәһбири Индустрияләштүрүш күни даирисидә «Алтын сапа» мукапитиниң лауреатлириға мәхсус мукапатларни вә «Парыз» конкурсиниң ғалибиға Баш мукапатни тапшурди.«Алтын сапа» вә «Парыз» конкурсиниң мукапатлирини тапшуруш  бу товарлар вә хизмәтләр сүпити саһасида чоң нәтиҗиләрни қолға кәлтүргән вә һәқиқий тиҗарәтниң иҗтимаий җавапкәрлиги үлгисини көрсәткән тиҗарәтчиләргә һөрмәт билдүрүш болуп һесаплиниду. Әнъәнә бойичә лаураетларни тәнтәнилик мукапатлаш мәрасими жилниң ахирида өткүзүлүп, ғалипларға алий мукапатни шәхсән Дөләт рәһбириниң өзи тапшурди. Бийил «2015-жилниң әң яхши индустриал лайиһиси» үчүн KAZ Mіnerals топиниң президенти Владимир Ким билән «2015-жилниң әң яхши инновациялик лайиһиси» үчүн «Элтекс Алатау» ҖЧЙ мудири Нурлан Жәнибековқа Нурсултан Назарбаев «Алтын сапа» конкурсиниң алтун стауэткиларни тапшурди. Президент шундақла «Самұрық-Энерго» акционерлиқ җәмийити башқармисиниң рәиси Алмасадам Сәтқалиевқа «Парыз» конкурсиниң Баш мукапитини тапшурди. 2015-жилниң қалған ғалиплириға мукапатларни дөләт кативи Гүлшара Әбдиқалықова, Премьер-Министр Кәрим Мәсимов, Премьер-Министрниң орунбасарлири Бақытжан Сағынтаев вә Дариға Назарбаева, инвестицияләр вә тәрәққият, саламәтликни сақлаш вә иҗтимаий тәрәққият министрлири Әсет Исекешев, Тамара Дүйсенова, «Атамекен» Миллий тиҗарәтчиләр палатиси президиуминиң рәиси Тимур Қулибаев вә башқилар тапшурди. Мәлумки, елимиз тиҗарәтчилири үчүн әһмийәтлик болған мошундақ конкурс қатнашқучилириниң сани жилдин-жилға өсмәктә. Мәсилән, 2006-жили «Алтын сапа» конкурсиға 52 кархана қатнашқан болса, 2015-жили өткүзүлгән онинчи, юбилейлиқ конкурсқа 153 қатнашқучи мукапаттин үмүткар екәнлигини билдүрди. Уларниң тәңдин-толисини — йәни 69 карханини кичик тиҗарәт субъектлири тәшкил қилса, 44и оттура вә 40 чоң карханиға вакаләтлик қилди. Чарә-тәдбир даирисидә шундақла «Қазақстанниң әң яхши товари» җумһурийәтлик конкурсиниң ғалиплириғиму мукапатлар тапшурулди. Индустрияләштүрүш күнигә беғишланған телекөрүккә вә ғалипларни мукапатлаш мәрасимиға миллитимиз вәкиллиридин «АЗМК» җавапкәрлиги чәкләнгән йолдашлиғиниң мудири Шөһрәт Шардинов қатнашти.